അപകട ഭീഷണിയില്‍ ട്രാന്‍സ്‌ഫോമര്‍; അധികൃതര്‍ അനാസ്ഥ വെടിയുക: എസ്ഡിപിഐ

കൊയിലാണ്ടി: നടേരി മൂഴിക്കുമീത്തല്‍ പ്രദേശത്ത് നെല്ലാറ്റു പുറത്തുതാഴെ സ്ഥാപിച്ച 11 കെവി ചിങ്ങപുരം ഫീഡറിലുള്ള ട്രാന്‍സ്‌ഫോമര്‍ പോസ്റ്റ് ഒടിഞ്ഞുവീഴാറായി. കേബിള്‍ ഇന്‍സിലേഷന്‍ കത്തിനശിച്ചും ഫ്യൂസുകള്‍ പൊട്ടിത്തകര്‍ന്ന അവസ്ഥയിലുമാണ്. കൂടാതെ വിദ്യാര്‍ഥികള്‍ അടക്കം നിരവധി ആളുകള്‍ യാത്ര ചെയ്യുന്ന പാതയോരത്ത് ട്രാന്‍സ്‌ഫോമറിന് സുരക്ഷാവേലിയും സ്ഥാപിച്ചിട്ടില്ല.

ഇത് വലിയൊരു ദുരന്തത്തിന് തന്നെ കാരണമായേക്കും. അതിനാല്‍, അധികൃതരുടെ ഭാഗത്തുനിന്ന് അടിയന്തര ഇടപെടലുണ്ടാവണമെന്ന് എസ്ഡിപിഐ മൂഴിക്കുമീത്തല്‍ ബ്രാഞ്ച് കമ്മിറ്റി ആവശ്യപ്പെട്ടു. പ്രസിഡന്റ് പി കെ ഷമീര്‍, സെക്രട്ടറി വി കെ സിറാജ്, എന്‍ കെ ഷാജി, കെ ഹനീഫ തുടങ്ങിയവര്‍ സംസാരിച്ചു.