പനി ന്യുമോണിയ ആയി; ഉന്നാവ് പെണ്കുട്ടിയുടെ നില ഗുരുതരം
വ്യാഴാഴ്ച മുതല് പെണ്കുട്ടിക്ക് പനി അനുഭവപ്പെട്ടിരുന്നു. തുടര്പരിശോധനയിലാണ് ന്യുമോണിയ ബാധ കണ്ടെത്തിയത്. ആരോഗ്യനിലയില് നേരിയ പുരോഗതിയുണ്ടെന്ന് മെഡിക്കല് റിപ്പോര്ട്ട് പുറത്തുവന്നതിനു പിന്നാലെ പനി ബാധിക്കുകയും തുടര്ന്ന് ന്യൂമോണിയ പിടിപെടുകയുമായിരുന്നു.
ലഖ്നോ: വാഹനാപകടത്തില് പരുക്കേറ്റ് ലഖ്നൗവിലെ കിങ് ജോര്ജ് ആശുപത്രിയില് ചികില്സയില് കഴിയുന്ന ഉന്നാവ് പെണ്കുട്ടിക്ക് ന്യുമോണിയ ബാധിച്ചെന്ന് ഡോക്ടര്മാര്. പെണ്കുട്ടിയുടെ ആരോഗ്യനില ഗുരുതരമായി തുടരുകയാണെന്നും അധികൃതര് അറിയിച്ചു.
വ്യാഴാഴ്ച മുതല് പെണ്കുട്ടിക്ക് പനി അനുഭവപ്പെട്ടിരുന്നു. തുടര്പരിശോധനയിലാണ് ന്യുമോണിയ ബാധ കണ്ടെത്തിയത്. ആരോഗ്യനിലയില് നേരിയ പുരോഗതിയുണ്ടെന്ന് മെഡിക്കല് റിപ്പോര്ട്ട് പുറത്തുവന്നതിനു പിന്നാലെ പനി ബാധിക്കുകയും തുടര്ന്ന് ന്യൂമോണിയ പിടിപെടുകയുമായിരുന്നു.
പെണ്കുട്ടിയുടെ ആരോഗ്യനിലയില് നേരിയ പുരോഗതിയുണ്ടായത് ആശാവഹമാണെന്ന് ഇന്നലെ ഡോക്ടര്മാര് അറിയിച്ചിരുന്നു. തുടര്ന്നാണ് ചികില്സക്കായി ഡല്ഹിയിലേക്ക് മാറ്റേണ്ടതില്ലെന്ന് ആശുപത്രി അധികൃതര് തീരുമാനിച്ചത്.
കുടുംബാംഗങ്ങളും സമാന നിലപാട് സ്വീകരിക്കുകയായിരുന്നു. മികച്ച ചികിത്സയാണ് പെണ്കുട്ടിക്ക് കിട്ടുന്നതെന്നും തല്ക്കാലം മാറ്റേണ്ടതില്ലെന്നും കുടുംബാംഗങ്ങള് കോടതിയെയും അറിയിച്ചു. ഇതനുസരിച്ചാണ് പെണ്കുട്ടിയെ ഉടന് ഡല്ഹിയിലേക്ക് എയര്ലിഫ്റ്റ് ചെയ്യണമെന്ന ഉത്തരവ് തല്ക്കാലം സുപ്രിംകോടതി മരവിപ്പിച്ചത്.
അതേസമയം, ഉന്നാവ് പെണ്കുട്ടിയും കുടുംബവും സഞ്ചരിച്ച വാഹനം അപകടത്തില്പ്പെട്ടതുമായി ബന്ധപ്പെട്ട കേസില് സിബിഐ ഇന്ന് കുല്ദീപ് സെംഗര് എംഎല്എയെ ചോദ്യം ചെയ്തു. സീതാപൂര് ജയിലിലെത്തിയാണ് സിബിഐ സംഘം എംഎല്യെ ചോദ്യം ചെയ്തത്. വാഹനാപകടത്തിനു പിന്നില് കുല്ദീപ് സിംഗ് സെംഗാര് ആണെന്നാണ് ആരോപണം. ഉന്നാവ് പെണ്കുട്ടി ബലാത്സംഗത്തിനിരയായ കേസിലാണ് സെംഗാര് ജയിലിലായത്.