കൊവിഡ്: രണ്ടാം ഡോസിനായി സ്‌പോട്ട് വാക്‌സിനേഷന്‍ സൗകര്യം അനുവദിക്കും
കൊവാക്‌സീന്‍ ആദ്യ ഡോസ് സ്വീകരിച്ച് 42 ദിവസം കഴിഞ്ഞവര്‍ക്കും കൊവിഷീല്‍ഡ് ആദ്യ ഡോസ് സ്വീകരിച്ച് 112 ദിവസം കഴിഞ്ഞവര്‍ക്കുമാണ് പ്രത്യേക പരിഗണന നല്‍കുന്നത്
കൊച്ചി: കൊവിഡ് പ്രതിരോധ വാക്‌സിന്റെ ആദ്യ ഡോസ് സ്വീകരിച്ച് നിശ്ചിത ദിവസം കഴിഞ്ഞവര്‍ക്ക് രണ്ടാം ഡോസ് വാക്‌സിന്‍ നല്‍കുന്നതിനായി പ്രത്യേക സ്‌പോട്ട് വാക്‌സിനേഷന്‍ സൗകര്യം അനുവദിക്കുമെന്ന് എറണാകുളം ജില്ലയിലെ വാക്‌സിനേഷന്‍ നോഡല്‍ ഓഫീസര്‍.കൊവാക്‌സീന്‍ ആദ്യ ഡോസ് സ്വീകരിച്ച് 42 ദിവസം കഴിഞ്ഞവര്‍ക്കും കൊവിഷീല്‍ഡ് ആദ്യ ഡോസ് സ്വീകരിച്ച് 112 ദിവസം കഴിഞ്ഞവര്‍ക്കുമാണ് പ്രത്യേക പരിഗണന നല്‍കുന്നത്.
ഇവര്‍ അടുത്തുള്ള വാക്‌സിനേഷന്‍ കേന്ദ്രത്തില്‍ ആധാര്‍ കാര്‍ഡ്, ആദ്യ ഡോസ് വാക്‌സിന്‍ സ്വീകരിച്ചതിന്റെ രേഖ എന്നിവയുമായി എത്തണം. ഇവര്‍ക്കായി വാക്‌സിനേഷന്‍ കേന്ദ്രത്തില്‍ 20 ശതമാനം സ്‌പോട്ട് വാക്‌സിനേഷന്‍ അനുവദിക്കുമെന്ന് എറണാകുളം ജില്ലയിലെ വാക്‌സിനേഷന്‍ നോഡല്‍ ഓഫീസര്‍ ജില്ലാ ദുരന്തനിവാരണ അതോറിറ്റി യോഗത്തില്‍ അറിയിച്ചു.
സഞ്ചരിക്കുന്ന കൊവിഡ് പരിശോധനാ സംഘങ്ങളുടെ സേവനം വാക്‌സിനേഷന്‍ കേന്ദ്രങ്ങളിലും ലഭ്യമാക്കുന്നതിന് യോഗത്തില്‍ നിര്‍ദ്ദേശം നല്‍കി. ജില്ലയിലെ മുന്‍സിപ്പാലിറ്റികളിലെ കൊവിഡ് പ്രതിരോധ നടപടികള്‍ വിലയിരുത്തുന്നതിനായി പ്രത്യേക യോഗം ചേരും.