വിവാഹവേദിയിൽ തോക്കുമായി നാഗാ വിമതനേതാവിന്റെ മകനും വധുവും
നവംബർ 9 ന് നടന്ന വിവാഹ സൽക്കാര പരിപാടിയിൽ പങ്കെടുത്തവർ തോക്കുകൾ പ്രദർശിപ്പിച്ചതിൽ പരിഭ്രാന്തരായി.
ദിമാപുർ: വിവാഹവേദിയിൽ തോക്കുമായി ഫോട്ടോയ്ക്കു പോസ് ചെയ്ത് നാഗാലാൻഡ് വിമതനേതാവിന്റെ മകനും വധുവും. നാഗാലാൻഡിലെ ദിമാപൂരിൽ ശനിയാഴ്ച നടന്ന വിവാഹ ചടങ്ങിലാണ് വിമതനേതാവായ ബൊഹോതോ കിബയുടെ മകനും വധുവും തോക്കേന്തി ചിത്രമെടുത്തത്.
ദിമാപൂരിലെ നാഗാലാൻഡ് കൊമേഴ്സ്യൽ ഹബിലാണു വിവാഹം നടന്നത്. നിരവധി പേർ വിവാഹത്തിൽ പങ്കെടുത്തു. ഇതിനിടെയാണു വരനും വധുവും തോക്കേന്തി ചിത്രമെടുത്തത്. എകെ 56, എം16 തോക്കുകളാണ് ഇവരുടെ കൈയിലുണ്ടായിരുന്നത് എന്നാണു റിപോർട്ടുകൾ.
നാഷണൽ സോഷ്യലിസ്റ്റ് കൗണ്സിൽ ഓഫ് നാഗാലാൻഡ് യൂണിഫിക്കേഷൻ (എൻഎസ് സി എൻ-യു) ആഭ്യന്തര മന്ത്രിയാണു ബൊഹോതോ കിബ. ഈ സംഘടന ഇപ്പോൾ കേന്ദ്രവുമായി സമാധാന ചർച്ചകൾ നടത്തിവരികയാണ്. നവംബർ 9 ന് നടന്ന വിവാഹ സൽക്കാര പരിപാടിയിൽ പങ്കെടുത്തവർ തോക്കുകൾ പ്രദർശിപ്പിച്ചതിൽ പരിഭ്രാന്തരായി.