ബംഗാളില്‍ തൃണമൂല്‍-ബിജെപി സംഘര്‍ഷം; ബിജെപി സ്ഥാനാര്‍ഥിയുടെ കാര്‍ തകര്‍ത്തു
പോളിങ് സ്‌റ്റേഷനു മുന്നില്‍ ഇദ്ദേഹത്തെ തടഞ്ഞ തൃണമൂല്‍ പ്രവര്‍ത്തകര്‍ ചില്ല് അടിച്ചുതകര്‍ക്കുകയായിരുന്നു
കൊല്‍ക്കത്ത: പശ്ചിമബംഗാളിലെ അസന്‍സോള്‍ മണ്ഡലത്തിലെ തൃണമൂല്‍ കോണ്‍ഗ്രസ്-ബിജെപി പ്രവര്‍ത്തകര്‍ തമ്മില്‍ ഏറ്റുമുട്ടി. 199ാം നമ്പര്‍ ബൂത്തിലാണ് ബിജെപി സ്ഥാനാര്‍ഥിയും കേന്ദ്രമന്ത്രിയുമായ ബാബുല്‍ സുപ്രിയോയുടെ കാര്‍ തകര്‍ത്തത്. പോളിങ് സ്‌റ്റേഷനു മുന്നില്‍ ഇദ്ദേഹത്തെ തടഞ്ഞ തൃണമൂല്‍ പ്രവര്‍ത്തകര്‍ ചില്ല് അടിച്ചുതകര്‍ക്കുകയായിരുന്നു. തുടര്‍ന്ന് ബിജെപി-തൃണമൂല്‍ കോണ്‍ഗ്രസ് പ്രവര്‍ത്തകര്‍ തമ്മില്‍ സംഘര്‍ഷമുണ്ടായി. അക്രമികളെ തടയാന്‍ പോലിസ് ലാത്തിവീശി. ബാബുല്‍ സുപ്രിയോ കാറിലുള്ളപ്പോഴാണ് ചില്ലുകള്‍ തകര്‍ത്തതെന്ന് ദൃശ്യങ്ങളില്‍ നിന്നു വ്യക്തമാവുന്നുണ്ട്. വോട്ടര്‍മാര്‍ തന്നെ വോട്ട് ചെയ്യാന്‍ അനുവദിച്ചില്ലെന്നും ജനാധിപത്യ സംരക്ഷണത്തിനു വേണ്ടിയാണ് പോരാടുന്നതെന്നും അദ്ദേഹം പറഞ്ഞു.