കേരളം ഒരു നേട്ടം കൈവരിക്കുമ്പോള്, വ്യാജപ്രചാരണങ്ങളുമായി ഇറങ്ങുന്നത് ബിജെപിയുടെ രാഷ്ട്രീയ ദാരിദ്ര്യം: വി ശിവന്കുട്ടി
തിരുവനന്തപുരം: കേരളം കൈവരിച്ച ചരിത്രപരമായ നേട്ടങ്ങളെ ഇകഴ്ത്തിക്കാട്ടാനും അതിന്റെ പിതൃത്വം തട്ടിയെടുക്കാനും ബിജെപി സംസ്ഥാന പ്രസിഡന്റ് നടത്തുന്ന ശ്രമം പരിഹാസ്യമാണെന്ന് വി ശിവന്കുട്ടി. കേരളം ഇന്ന് അതിദാരിദ്ര്യ വിമുക്ത സംസ്ഥാനമായി മാറിയെങ്കില്, അതിന്റെ സമ്പൂര്ണ്ണ ഉത്തരവാദിത്തവും ക്രെഡിറ്റും ഈ നാടിന്റെ പുരോഗമനപരമായ സാമൂഹിക ഘടനയ്ക്കും ഈ നേട്ടം കൈവരിക്കാന് കൃത്യമായ പദ്ധതി ആവിഷ്കരിച്ച് നടപ്പിലാക്കിയ ഇടതുപക്ഷ ജനാധിപത്യ മുന്നണി സര്ക്കാരിനുമാണെന്നും ശിവന്കുട്ടി പറഞ്ഞു. ഫെയ്സ്ബുക്ക് കുറിപ്പിലൂടെയാണ് അദ്ദേഹം ഇക്കാര്യം പങ്കുവച്ചത്. കേരളം ഒരു നേട്ടം കൈവരിക്കുമ്പോള് അതില് അസൂയ പൂണ്ട് വ്യാജപ്രചാരണങ്ങളുമായി ഇറങ്ങുന്നത് ബിജെപിയുടെ രാഷ്ട്രീയ ദാരിദ്ര്യമാണെന്നും ശിവന്കുട്ടി പറഞ്ഞു.
ഫെയ്സ്ബുക്ക് കുറിപ്പിന്റെ പൂര്ണരൂപം,
കേരളം കൈവരിച്ച ചരിത്രപരമായ നേട്ടങ്ങളെ ഇകഴ്ത്തിക്കാട്ടാനും അതിന്റെ പിതൃത്വം തട്ടിയെടുക്കാനും ബിജെപി സംസ്ഥാന പ്രസിഡന്റ് നടത്തുന്ന ശ്രമം പരിഹാസ്യമാണ്. കേരളം ഇന്ന് അതിദാരിദ്ര്യ വിമുക്ത സംസ്ഥാനമായി മാറിയെങ്കില്, അതിന്റെ സമ്പൂര്ണ്ണ ഉത്തരവാദിത്തവും ക്രെഡിറ്റും ഈ നാടിന്റെ പുരോഗമനപരമായ സാമൂഹിക ഘടനയ്ക്കും ഈ നേട്ടം കൈവരിക്കാന് കൃത്യമായ പദ്ധതി ആവിഷ്കരിച്ച് നടപ്പിലാക്കിയ ഇടതുപക്ഷ ജനാധിപത്യ മുന്നണി സര്ക്കാരിനുമാണ്.
'കേരള മോഡല് കൊണ്ടു മാത്രം ഈ നേട്ടം കൈവരിക്കാന് കഴിയില്ലായിരുന്നു' എന്ന വാദം വസ്തുതകളെ പൂര്ണ്ണമായി നിഷേധിക്കുന്നതാണ്. എന്താണ് ഈ നേട്ടത്തിന് പിന്നിലെ യാഥാര്ത്ഥ്യം?
- വ്യക്തമായ ആസൂത്രണം: സര്ക്കാര് അധികാരത്തില് വന്ന ശേഷം, സംസ്ഥാനത്ത് അതിദാരിദ്ര്യം അനുഭവിക്കുന്ന 64,006 കുടുംബങ്ങളെ കൃത്യമായി കണ്ടെത്തുകയും, ഓരോ കുടുംബത്തിനും മൈക്രോ പ്ലാനുകള് തയ്യാറാക്കി, അവരെ അതിദാരിദ്ര്യത്തില് നിന്ന് മോചിപ്പിക്കാനുള്ള ചിട്ടയായ പ്രവര്ത്തനം നടത്തുകയുമായിരുന്നു. ഇത് പൂര്ണ്ണമായും കേരള സര്ക്കാരിന്റെ തനത് പദ്ധതിയാണ്.
- ശക്തമായ അടിത്തറ: ഇന്ത്യയില് മറ്റൊരിടത്തും ഇല്ലാത്ത സാര്വത്രിക പൊതുവിതരണ ശൃംഖല, ശക്തമായ സാമൂഹ്യ സുരക്ഷാ പെന്ഷന് പദ്ധതികള്, തദ്ദേശ സ്വയംഭരണ സ്ഥാപനങ്ങളുടെയും കുടുംബശ്രീയുടെയും സജീവമായ ഇടപെടല് എന്നിവയാണ് കേരള മോഡലിന്റെ കരുത്ത്. ഈ അടിത്തറയില്ലാതെ ഒരു കേന്ദ്ര പദ്ധതിക്കും ഇങ്ങനെയൊരു നേട്ടം ഇവിടെ കൈവരിക്കാന് സാധ്യമല്ല.
- കേന്ദ്രം ചെയ്തതെന്ത്?: 'നരേന്ദ്ര മോദി സര്ക്കാരിന്റെ ക്ഷേമപദ്ധതികള്' എന്ന് അങ്ങ് അവകാശപ്പെടുമ്പോള്, കേരളത്തിന്റെ അതിജീവനത്തിനായുള്ള എല്ലാ ശ്രമങ്ങളെയും സാമ്പത്തികമായി ഞെരുക്കുന്ന നടപടികളാണ് കേന്ദ്രം തുടര്ച്ചയായി സ്വീകരിക്കുന്നത് എന്ന കാര്യം മറക്കരുത്. സംസ്ഥാനത്തിന്റെ അര്ഹമായ വിഹിതം തടഞ്ഞുവെച്ചും, കടമെടുപ്പ് പരിധി വെട്ടിക്കുറച്ചും കേരളത്തെ ബുദ്ധിമുട്ടിക്കുമ്പോള് ആണ് നമ്മള് ഈ ചരിത്രനേട്ടം കൈവരിച്ചത്.
കേരളത്തിന്റെ നേട്ടം ഇന്ത്യയ്ക്കാകെ അവകാശപ്പെട്ടതാണെന്ന് മുഖ്യമന്ത്രി പറഞ്ഞെങ്കില്, അത് ഇന്ത്യന് ഫെഡറലിസത്തിന്റെ മഹത്വവും, മറ്റ് സംസ്ഥാനങ്ങള്ക്ക് മാതൃകയാവാനുള്ള കേരളത്തിന്റെ സന്നദ്ധതയുമാണ് കാണിക്കുന്നത്. അല്ലാതെ, ഡല്ഹിയിലിരുന്ന് കേരളത്തിന്റെ പുരോഗതിക്ക് തുരങ്കം വെക്കുന്നവരുടെ ഔദാര്യമാണ് ഈ നേട്ടം എന്നല്ല.
കേരളം ഒരു നേട്ടം കൈവരിക്കുമ്പോള് അതില് അസൂയ പൂണ്ട് വ്യാജപ്രചാരണങ്ങളുമായി ഇറങ്ങുന്നത് ബിജെപിയുടെ രാഷ്ട്രീയ ദാരിദ്ര്യമാണ് കാണിക്കുന്നത്. കേരളത്തിന്റെ അഭിമാന നിമിഷത്തില് സിനിമാ താരങ്ങള് എന്നല്ല, ഈ നാടിനെ സ്നേഹിക്കുന്ന ആരും പങ്കുചേരും. അതില് അസഹിഷ്ണുത കാണിച്ചിട്ട് കാര്യമില്ല.
ജനങ്ങള്ക്ക് സത്യം കൃത്യമായി അറിയാം. കേരളം നേടിയെടുത്ത ഈ നേട്ടത്തെ റദ്ദ് ചെയ്യാനോ, അതിന്റെ നിറം കെടുത്താനോ ഒരു രാഷ്ട്രീയ മുതലെടുപ്പിനും സാധ്യമല്ല.