കെ പി ഒ റഹ്മത്തുല്ല
മലപ്പുറം: കേരളത്തില് നിരവധി പേരുടെ കയ്യില് നിന്നും മണി ചെയിന് മാതൃകയില് പണം വാങ്ങി തട്ടിപ്പ് നടത്തി കേരളത്തില് നിന്നും മുങ്ങിയയാള് വീണ്ടും തട്ടിപ്പുമായി രംഗത്തെത്തിയതായി പരാതി. എംസിടി എന്ന കമ്പനിയാണ് ലോക്ക് ഡൗണ് സമയത്ത് തട്ടിപ്പുമായി വീണ്ടും സജീവമായിരിക്കുന്നതെന്നാണ് ആരോപണം. ടോള് ഡീല് വെന്ജ്വര് എന്ന പേരിലും മറ്റു പല പേരുകളിലുമായി ഇവര് കഴിഞ്ഞ കുറച്ചു ദിവസങ്ങളിലായി ഓണ്ലൈന് മീറ്റിംഗുകള് സംഘടിപ്പിച്ചു വരികയാണ്.
എംടിസി എന്ന കമ്പനിയുടെ അമരക്കാരായ രണ്ടുപേരെ അടുത്തിടെ പോലീസ് അറസ്റ്റ് ചെയ്തിരുന്നു. ഇന്നവര് മാര്ക്കറ്റിംഗ് നടത്തുന്നത് ഈ അറസ്റ്റിന്റെ പേര് പറഞ്ഞാണ്. തെറ്റിദ്ധാരണയുടെ പേരില് തങ്ങളുടെ രണ്ടു സഹ പ്രവര്ത്തകരെ അറസ്റ്റ് ചെയ്തു അമളി പറ്റിയ പോലീസ് വെറുതെ വിട്ടു എന്നും പറഞ്ഞാണ് കമ്പനി മാര്ക്കറ്റിങ് നടത്തുന്നത്.
ട്രേഡിങ്ങിന്റെ പേരില് പണം വാങ്ങി തട്ടിക്കുന്ന സംഘങ്ങള് ഇന്ന് കേരളത്തില് വ്യാപകമാണ്. ഇവര്ക്കെതിരെ ശക്തമായ നടപടിയെടുക്കാത്തതാണ് ഇത്തരം തട്ടിപ്പ് സംഘങ്ങള് സജീവമാകാന് ഇടയാക്കുന്നത്.
കഴിഞ്ഞ ദിവസം ഈ തട്ടിപ്പിനെ സംബന്ധിച്ച് പരാതി നല്കാന് കൊല്ലം ജില്ലയിലെ ഒരു പോലിസ് സ്റ്റേഷനില് പോയ ഒരാളോട് കേസ് എടുക്കാന് ഒരു താല്പര്യവും ഇല്ലാത്ത പോലെയാണ് പോലിസ് ഉദ്യോഗസ്ഥര് സംസാരിച്ചത്. കുറ്റവാളിയെ പോലെ മാറ്റി നിര്ത്തിയെന്നും മണിക്കൂറുകള് കാത്തിരുന്നിട്ടും കേസ് രജിസ്റ്റര് ചെയ്യാന് പോലും പോലിസ് ഉദ്യോഗസ്ഥര് തയ്യാറായില്ലെന്നും പരാതിക്കാരന് പറയുന്നു.