തിരുവനന്തപുരം: മലയാള സാഹിത്യരംഗത്തെ അതുല്യ പ്രതിഭ യു എ ഖാദറിന്റെ വേര്‍പാടില്‍ എസ്ഡിപിഐ സംസ്ഥാന ജനറല്‍ സെക്രട്ടറി പി അബ്ദുല്‍ ഹമീദ് അനുശോചനം രേഖപ്പെടുത്തി. മ്യാന്‍മറില്‍ ജനിച്ച് പിന്നീട് കേരളക്കരയിലെത്തിയ യു എ ഖാദര്‍ കേരളീയമായ ഭാഷാ സംസ്‌കൃതിയെ ആവാഹിച്ച് മലയാളത്തനിമ നിറഞ്ഞ കൃതികള്‍ രചിച്ച് വായനക്കാരുടെ ഉള്ളകത്ത് ഇടം പിടിക്കുകയായിരുന്നു. ആനുകാലിക സംഭവങ്ങളെ സൂക്ഷ്മ നിരീക്ഷണം നടത്തി സാമൂഹിക യാഥാര്‍ഥ്യങ്ങളെയും വ്യക്തിഗതമായ അനുഭൂതികളെയും തന്റെ സര്‍ഗ്ഗാത്മകതയില്‍ വിളയിച്ചെടുത്ത് മലയാള സാഹിത്യത്തിന് സമര്‍പ്പിച്ച് ചിരപ്രതിഷ്ട നേടിയ സാഹിത്യകാരനാണ് യു എ ഖാദര്‍. അദ്ദേഹത്തിന്റെ വേര്‍പാടില്‍ വ്യസനിക്കുന്ന കുടുംബാംഗങ്ങളുടെയും സുഹൃത്തുക്കളുടെയും ദു:ഖത്തില്‍ പങ്കുചേരുന്നതായും അബ്ദുല്‍ ഹമീദ് അനുശോചന സന്ദേശത്തില്‍ പറഞ്ഞു.