എല്‍പിജി ഗോഡൗണ്‍ സ്ഥാപിക്കുന്നതിനെതിരേ പ്രതിഷേധം

വാണിമേല്‍: ജനവാസ കേന്ദ്രമായ ഉരുട്ടിയില്‍ ഭാരത് പെട്രോളിയം കോര്‍പറേഷന്‍ ലിമിറ്റഡിന്റെ എല്‍പിജി ഗോഡൗണ്‍ സ്ഥാപിക്കുന്നതിനെതിരേ സര്‍വകക്ഷി പ്രതിഷേധ കൂട്ടായ്മ സംഘടിപ്പിച്ചു. ഉരുട്ടിയില്‍ നടന്ന പ്രതിഷേധ കൂട്ടായ്മ വാര്‍ഡ് മെംബര്‍ ടി ജെ വര്‍ഗീസ് ഉദ്ഘാടനം ചെയ്തു. വാളാന്തോട്, അടുപ്പില്‍, ഉരുട്ടി ആദിവാസി കോളനികള്‍ക്ക് ഇടയില്‍ സ്വകാര്യ വ്യക്തിയുടെ സ്ഥലത്താണ് ഗോഡൗണ്‍ സ്ഥാപിക്കാനുള്ള നീക്കം ആരംഭിച്ചത്. നേരത്തെ വാണിമേല്‍ പഞ്ചായത്തിലെ പുതുക്കയത്ത് ഗോഡൗണ്‍ സ്ഥാപിക്കാനുള്ള പ്രാരംഭ നടപടികള്‍ തുടങ്ങിയതോടെ പരിസരവാസികള്‍ എതിര്‍പ്പുമായി രംഗത്ത് വന്നതോടെ ഇവിടെ നിന്ന് സ്ഥലം മാറ്റി ഉരുട്ടിയില്‍ സ്ഥാപിക്കാനുള്ള ഒരുക്കത്തിലാണ് കമ്പനി അധികൃതര്‍.
ഗോഡൗണിനായുള്ള സ്ഥലത്തിന്റെ നികുതി പഞ്ചായത്തില്‍ അടച്ചതായും പോലിസ് അന്വേഷണം നടത്തി പേപ്പര്‍ വര്‍ക്കുകള്‍ നടക്കുന്നതായും കമ്മിറ്റി ഭാരവാഹികള്‍ പറഞ്ഞു. ഉരുട്ടിയില്‍ ഡോഡൗണ്‍ സ്ഥാപിക്കുന്നതിനെതിരെ 45 അംഗ സര്‍വകക്ഷി ആക്ഷന്‍ കമ്മിറ്റി രൂപീകരിച്ചു. പി സി രാഗേഷ് ചെയര്‍മാന്‍, എ ചന്ദ്രബാബു ക ണ്‍വീനറായുമാണ് കമ്മിറ്റി രൂപീകരിച്ചത്.  പ്രതിഷേധ കൂട്ടായ്മയില്‍ പി എ ആന്റണി, കെ ജെ ഇഗ്‌നേഷ്യസ്, എം പി അനീഷ്, പി ടി സുനില്‍ കുമാര്‍, പി എ  ശശി മാസ്റ്റര്‍, രഞ്ജിത്ത് മാസ്റ്റര്‍ സംസാരിച്ചു.