മുഖ്യശത്രു ബിജെപി; സിപിഎമ്മിനെതിരേ ഒരുവാക്ക് മിണ്ടില്ല

കല്‍പ്പറ്റ: എന്റെ മുഖ്യശത്രു ബിജെപി മാത്രമാണെന്നും ഇന്ത്യ ഒന്നാണെന്ന സന്ദേശം നല്‍കുക മാത്രമാണ് കേരളത്തില്‍ നിന്ന് മല്‍സരിക്കുന്നതിന്റെ ലക്ഷ്യമെന്ന് വ്യക്തമാക്കി രാഹുല്‍ ഗാന്ധി. വയനാട്ടില്‍ നാമനിര്‍ദേശ പത്രിക നല്‍കി റോഡ്‌ഷോ നടത്തിയ ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം. സിപിഎമ്മിലെ എന്റെ സഹോദരി സഹോദരന്‍മാര്‍ ഇപ്പോള്‍ എനിക്കെതിരെ സംസാരിക്കുകയും അധിക്ഷേപിക്കുകയും ചെയ്യുമെന്ന് എനിക്കറിയാം. എന്നാല്‍, ഞാനൊരു കാര്യം പറയുന്നു. എന്റെ പ്രചാരണത്തില്‍ ഒരു വാക്ക് പോലും ഞാന്‍ സിപിഎമ്മിനെതിരേ സംസാരിക്കില്ല.

കേന്ദ്ര സര്‍ക്കാരും മോദിയും ആര്‍എസ്എസും ദക്ഷിണേന്ത്യയുടെ സംസ്‌കാരത്തേയും ഭാഷയേയും കടന്നാക്രമിക്കുകയും അവഗണിക്കുകയും ചെയ്യുന്നുണ്ട്. അതിനെതിരേ ഇന്ത്യ എന്നാല്‍ ഒന്നാണെന്ന സന്ദേശം പകരുകയാണ് തന്റെ ലക്ഷ്യമെന്നും രാഹുല്‍ പറഞ്ഞു.