വീടിന്റെ തറയിലാണ് ചാണകം, അല്ലാതെ തലയിലല്ല; സുരേഷ് ഗോപിയെ ട്രോളി സോഷ്യല്‍മീഡിയ

കോഴിക്കോട്: തന്നെ സംഘിയെന്നോ ചാണക സംഘിയെന്നോ വിളിച്ചോളൂ എന്ന് പറഞ്ഞ സുരേഷ് ഗോപിയെ ട്രോളിക്കൊന്ന് സോഷ്യല്‍മീഡിയ. ശ്രീനാരായണ ഗുരുവിന്റെ ചെമ്പഴന്തിയിലെ വീടിന്റെ തറ ഇപ്പോഴും ചാണകം മെഴുകിയതാണെന്നും അതിന് നല്ല ഉറപ്പുണ്ടെന്നുമുള്ള സുരേഷ് ഗോപിയുടെ പ്രസംഗമാണ് സാമൂഹിക മാധ്യമങ്ങളിലെ പരിഹാസത്തിന് ഇടയാക്കിയത്. 'വീടിന്റെ തറയിലാണ് ചാണകം, അല്ലാതെ തലയിലല്ല' എന്ന് ശ്രീ നാരായണ ഗുരു പറയുന്നതായുള്ള ട്രോള്‍ സാമൂഹിക മാധ്യമങ്ങളില്‍ വൈറലായി.

താന്‍ ഒരു ബിജെപി പ്രവര്‍ത്തകനാണെന്നും തന്നെ സംഘിയെന്നോ ചാണക സംഘിയെന്നോ വിളിച്ചോളൂവെന്നുമാണ് സുരേഷ് ഗോപി എംപി പറഞ്ഞത്. കോഴിക്കോട് കോര്‍പ്പറേഷനില്‍ ബിജെപിയുടെ തെരഞ്ഞെടുപ്പ് പരിപാടിയില്‍ പങ്കെടുത്തു സംസാരിക്കുകയായിരുന്നു അദ്ദേഹം.

ലോകം മുഴുവന്‍ ആരാധിക്കുന്ന നരേന്ദ്രമോദിയുടെ പടയാളിയും ശിഷ്യനുമാണ് താനെന്ന് സുരേഷ് ഗോപി പറഞ്ഞു. ശ്രീനാരായണ ഗുരുവിന്റെ ചെമ്പഴന്തിയിലെ വീടിന്റെ തറ ഇപ്പോഴും ചാണകം മെഴുകിയതാണ്. ആ തറയ്ക്ക് നല്ല ഉറപ്പുണ്ട്. അതാണ് നമ്മള്‍. അല്ലാതെ വേറെ ചിലരെ പോലെ മറ്റു പലതുമല്ല തറയില്‍ നമ്മള്‍ മെഴുകിയതെന്നും സുരേഷ് ഗോപി പറഞ്ഞു.