വിദ്യാർഥികളുടെ കൺസെഷൻ നിരക്കും ബസ് ചാർജും വർധിപ്പിക്കും: ആൻ്റണി രാജു

തിരുവനന്തപുരം: സംസ്ഥാനത്ത് ബസ് ചാർജ് വർധിപ്പിക്കുമെന്ന് വ്യക്തമാക്കി ഗതാഗത മന്ത്രി ആൻ്റണി രാജു. ശബരിമല മകര വിളക്കിന് ശേഷമാകും നിരക്ക് വർധനയുണ്ടാകുകയെന്നും അദ്ദേഹം വ്യക്തമാക്കി. ബസ് ചാർജ് വർധനയുൾപ്പെടെയുള്ള ആവശ്യങ്ങൾ ഉന്നയിച്ച് ഈ മാസം 21 മുതൽ സ്വകാര്യ ബസുടമകൾ അനിശ്ചിതകാല പണിമുടക്ക് പ്രഖ്യാപിച്ച പശ്ചാത്തലത്തിലാണ് നിരക്ക് വർധനയിൽ മന്ത്രി നിലപാട് വ്യക്തമാക്കിയത്.

വിദ്യാർഥികളുടെ കൺസെഷൻ നിരക്കിലും വർധനയുണ്ടാകുമെന്ന് മന്ത്രി അറിയിച്ചു. ബസ് ചാർജ് വർധിപ്പിക്കുന്നതിനൊപ്പം വിദ്യാർഥികളുടെ കൺസെഷൻ നിരക്ക് വർധിപ്പിക്കണമെന്ന ആവശ്യം സ്വകാര്യ ബസ് അസോസിയേഷൻ മുന്നോട്ട് വെച്ചിരുന്നു. വിദ്യാർഥികളുടെ കൺസെഷൻ നിരക്ക് വർധിപ്പിക്കാതെയുള്ള ബസ് ചാർജ് വർധന വേണ്ടെന്ന നിലപാടാണ് ബസ് ഉടമകളുടേത്.

ബസ് ചാർജ് വർധനയുമായി ബന്ധപ്പെട്ട് ജസ്റ്റിസ് രാമചന്ദ്രൻ കമ്മിഷനുമായി ഗതാഗത മന്ത്രി ഇന്ന് ചർച്ച നടത്തും. ഇതിന് ശേഷം പ്രഖ്യാപനം ഉണ്ടായേക്കും. വിദ്യാർഥികളുടെ കൺസെഷൻ നിരക്കിൽ മാറ്റം വരുത്തരുതെന്ന ആവശ്യം വിദ്യാർഥി സംഘടനകളുടെ ഭാഗത്ത് നിന്നുമുണ്ടായത് സർക്കാരിനെ പ്രതിരോധത്തിലാക്കുന്നുണ്ട്.

മിനിമം കൺസെഷൻ നിരക്ക് അഞ്ച് രൂപയാക്കണമെന്നാണ് ജസ്റ്റിസ് രാമചന്ദ്രൻ കമ്മിഷൻ്റെ ശുപാർശയിലുള്ളത്. ആറ് രൂപയാക്കണമെന്ന ആവശ്യമാണ് ബസ് ഉടമകളുടെ ഭാഗത്ത് നിന്നുമുണ്ടാകുന്നത്. എന്നാൽ, ഇത്ര വലിയ വർധന പറ്റില്ലെന്നും ഒന്നര രൂപയാക്കാമെന്നുമാണ് സർക്കാർ നിലപാട്. വിദ്യാർഥികളുടെ യാത്രാ നിരക്ക് വർധിപ്പിക്കുന്നത് വിവാദമാകാൻ സാധ്യതയുള്ളതിനാൽ കൂടിയാലോചനകൾക്ക് ശേഷമാകും ഇക്കാര്യത്തിൽ അന്തിമതീരുമാനം ഉണ്ടാവുക.

വിദ്യാർഥികളുടെ യാത്രാനിരക്ക് വർധിപ്പിക്കുക, ഡീസൽ സബ്സിഡി നൽകുക, മിനിമം ചാർജ് 8 രൂപയിൽ നിന്നും 12 ആക്കി ഉയർത്തുക, കിലോമീറ്റർ നിരക്ക് നിലവിലെ 90 പൈസ എന്നതിൽ നിന്നും ഒരു രൂപയാക്കി ഉയർത്തുക, കൊവിഡ്-19 കാലം കഴിയുന്നതുവരെ ബസുടമകളുടെ വാഹന നികുതി പൂർണമായി ഒഴിവാക്കുക എന്നീ ആവശ്യങ്ങളാണ് ബസുടമകളുടെ ഭാഗത്ത് നിന്നും നേരത്തെ ഉണ്ടായത്.