ട്രെയ്ന്‍ യാത്രക്കിടയിലെ പരിചയം; യുവാവ് വീട്ടിലെത്തി മയക്കുഗുളിക നല്‍കി ആറ് പവന്‍ സ്വര്‍ണം കവര്‍ന്നു

വളാഞ്ചേരി: ട്രെയ്ന്‍ യാത്രക്കിടെ സൗഹൃദം സ്ഥാപിച്ച യുവാവ് വീട്ടിലെത്തി വയോധികരായ ദമ്പതിമാരുടെ ആറുപവന്‍ സ്വര്‍ണം കവര്‍ന്നു. ഗ്യാസിനുള്ള മരുന്നെന്ന വ്യാജേനെ മയക്കുഗുളിക നല്‍കിയായിരുന്നു മോഷണം. വളാഞ്ചേരി കോട്ടപ്പുറം പെട്രോള്‍പമ്പിനു സമീപം താമസിക്കുന്ന കോഞ്ചത്ത് ചന്ദ്രനെയും (75) ഭാര്യ ചന്ദ്രമതി(63)യെയുമാണ് യുവാവ് വഞ്ചിച്ചിരിക്കുന്നത്.

ചന്ദ്രനും ഭാര്യ ചന്ദ്രമതിയും കഴിഞ്ഞ ചൊവ്വാഴ്ച മുട്ടുവേദനയ്ക്ക് ഡോക്ടറെ കാണാന്‍ കൊട്ടാരക്കരയില്‍ പോയിരുന്നു. ലോകമാന്യതിലക് ട്രെയിനില്‍ ജനറല്‍ കമ്പാര്‍ട്ട്‌മെന്റിലായിരുന്നു മടക്കയാത്ര. സീറ്റില്ലാതെ പ്രയാസപ്പെട്ട് വടികുത്തി നില്‍ക്കുന്ന ചന്ദ്രനെ, 35 വയസ്സു തോന്നിക്കുന്ന ഒരാള്‍ പരിചയപ്പെട്ടു. നാവികസേനയില്‍ ഉദ്യോഗസ്ഥനാണെന്നും പേര് നീരജാണെന്നും ഇയാള്‍ പറഞ്ഞു. തുടര്‍ന്ന് ദമ്പതികള്‍ക്ക് ഇയാള്‍ സീറ്റ് സംഘടിപ്പിച്ചു നല്‍കി. തുടര്‍ന്നുള്ള സംഭാഷണത്തില്‍ ആരോഗ്യപ്രശ്‌നങ്ങളും പങ്കുവച്ചു. നാവികസേനാ ആശുപത്രിയില്‍ കുറഞ്ഞ ചെലവില്‍ മുട്ടുമാറ്റല്‍ ശസ്ത്രക്രിയ ചെയ്യാന്‍ സൗകര്യമുണ്ടെന്നും താന്‍ ശ്രമിച്ചുനോക്കട്ടെയെന്നും ദമ്പതികളോട് നീരജ് പറഞ്ഞു. ഇതിന് ശേഷം നീരജ് ചേര്‍ത്തലയില്‍ ഇറങ്ങി.

ബുധനാഴ്ച രാവിലെ യുവാവ് ചന്ദ്രനെ ഫോണില്‍ വിളിച്ച് ശസ്ത്രക്രിയയുടെ കാര്യങ്ങള്‍ ശരിയാക്കിയിട്ടുണ്ടെന്നും നേരത്തേ ചികിത്സിച്ച കേസ് ഹിസ്റ്ററിയുണ്ടെങ്കില്‍ അതും ആവശ്യമായ മറ്റു രേഖകളും അടിയന്തരമായി വേണമെന്നും താമസിക്കുന്ന സ്ഥലം പറഞ്ഞാല്‍ താന്‍ വന്നു വാങ്ങിക്കൊള്ളാമെന്നും പറഞ്ഞു. ബുധനാഴ്ച ഉച്ചയോടെ ഇയാള്‍ ജ്യൂസുമായി ചന്ദ്രന്റെ വീട്ടിലെത്തി. ജ്യൂസ് കുടിച്ചശേഷം ഉച്ചഭക്ഷണം കഴിക്കുന്നതിനുമുന്‍പേ അസ്വസ്ഥത അനുഭവപ്പെട്ട ചന്ദ്രന് രണ്ട് ചെറിയ ഗുളിക നല്‍കി. ഗ്യാസിന്റെ കുഴപ്പമാണെന്നും ഉടനെ മാറുമെന്നുമാണ് യുവാവ് പറഞ്ഞതെന്ന് ചന്ദ്രന്‍ പറഞ്ഞു. ഗ്യാസ് വരാതിരിക്കാന്‍ നല്ലതാണെന്ന് പറഞ്ഞ് ചന്ദ്രമതിയെ കൊണ്ടും ഗുളിക കഴിപ്പിച്ചു. പിന്നീട് ബോധം വന്നപ്പോഴാണ് മോഷണം നടന്ന വിവരം അറിയുന്നത്. വളാഞ്ചേരി പോലിസ് അന്വേഷണം തുടങ്ങി.