ഹാമര്‍ തലയില്‍വീണ് വിദ്യാര്‍ഥി മരിച്ച സംഭവം: മൂന്ന് കായികാധ്യാപകര്‍ അറസ്റ്റില്‍

കോട്ടയം: പാലായില്‍ കായികമേളയ്ക്കിടെ ഹാമര്‍ തലയില്‍ വീണ് വിദ്യാര്‍ഥി മരിച്ച സംഭവത്തില്‍ മൂന്ന് കായികാധ്യാപകരെ അറസ്റ്റ് ചെയ്തു. പാലാ സെന്റ് തോമസ് ഹയര്‍സെക്കന്‍ഡറി സ്‌കൂളിലെ പ്ലസ് വണ്‍ വിദ്യാര്‍ഥി അഫീല്‍ ജോണ്‍സന്റെ മരണവുമായി ബന്ധപ്പെട്ടാണ് കായികാധ്യാപകരായ മാര്‍ട്ടിന്‍, കാസിം, ജോസഫ് എന്നിവരെ അസ്റ്റ് ചെയ്ത് സ്റ്റേഷന്‍ ജാമ്യത്തില്‍ വിട്ടയച്ചത്. കൃത്യനിര്‍വഹണത്തിലുണ്ടായ വീഴ്ച ചൂണ്ടിക്കാട്ടി മനപ്പൂര്‍വമല്ലാത്ത നരഹത്യയ്ക്കും അപകടകരമാം വിധം മല്‍സരങ്ങള്‍ സംഘടിപ്പിച്ചതിനുമാണ് പാലാ പോലിസ് കേസെടുത്തിരുന്നത്. പാലായില്‍ സംസ്ഥാന ജൂനിയര്‍ സ്‌കൂള്‍ അത്‌ലറ്റിക് മീറ്റിനിടെ ഒക്ടോബര്‍ നാലിനാണ് സംഭവം. ഗുരുതരമായി പരുക്കേറ്റ് ചികില്‍സസയിലായിരുന്ന അഫീല്‍ 18ാം ദിവസമാണ് മരിച്ചത്.