മദ്‌റസയില്‍ നിന്നും വരുന്ന പെണ്‍കുട്ടിയെ ആക്രമിക്കാന്‍ തെരുവുനായയുടെ ശ്രമം; രക്ഷിക്കാന്‍ ശ്രമിച്ച നിര്‍മാണതൊഴിലാളിയെ കടിച്ച് കീറി (video)

മലപ്പുറം: തിരൂര്‍ ചമ്രവട്ടത്ത് നിര്‍മാണതൊഴിലാളിയെ തെരുവുനായ കടിച്ചുകീറി. ആനൊഴുക്കുപാലത്തെ നിര്‍മാണതൊഴിലാളിയായ സുരേഷിനേയാണ് നായ ആക്രമിച്ചത്. മദ്‌റസയില്‍ നിന്നും വരുകയായിരുന്ന പെണ്‍കുട്ടിയെ തെരുവുനായയില്‍ നിന്നും രക്ഷിക്കാന്‍ ശ്രമിക്കുന്നതിനിടെയാണ് സുരേഷിന് കടിയേറ്റത്.

കഴിഞ്ഞ ബുധനാഴ്ചയാണ് സംഭവം. സംഭവത്തിന്റെ സിസിടിവി ദൃശ്യങ്ങള്‍ പുറത്തുവന്നിട്ടുണ്ട്. മദ്‌റസ കഴിഞ്ഞ് മടങ്ങുന്നതിനിടെയാണ് പെണ്‍കുട്ടിക്കുനേരെ തെരുവുനായ പാഞ്ഞടുത്തത്. സുരേഷ് സമീപത്ത് ബസ് കാത്തുനില്‍ക്കുകയായിരുന്നു. പെണ്‍കുട്ടിയെ തെരുവുനായ ആക്രമിക്കാനൊരുങ്ങുന്നത് കണ്ട സുരേഷ് റോഡ് മുറിച്ചുകടന്ന് രക്ഷിക്കാനൊരുങ്ങി. എന്നാല്‍ നായ ഓടിയെത്തിയ സുരേഷിനെ ആക്രമിക്കുകയായിരുന്നു. ആദ്യം കൈയ്യിലാണ് കടിച്ചത്. പിന്നാലെ പ്രതിരോധിക്കാനുള്ള ശ്രമത്തിനിടെ ഓടയില്‍ വീഴുകയും ചെയ്തു. ഓടയില്‍ വീണതിന് പിന്നാലെ സുരേഷിനെ തെരുവുനായ കടിച്ച് കീറുകയായിരുന്നു. സമീപത്തുള്ളവര്‍ സ്ഥലത്തെത്തി തെരുവുനായയെ അടിച്ചെങ്കിലും നായ പിന്തിരിഞ്ഞില്ല. കുറേനേരം നായ സുരേഷിന്റെ കയില്‍ തന്നെ കടിച്ചുകൊണ്ടിരുന്നു. അല്‍പ്പസമയത്തിന് ശേഷമാണ് സുരേഷിനെ രക്ഷിച്ചത്. ഇയാളുടെ ശരീരത്തില്‍ പതിനഞ്ചോളം മുറിവുകളുണ്ട്. സുരേഷിന് ചികില്‍സ നല്‍കി.