ഈ വര്‍ഷത്തെ ഹജ്ജിന് വിദേശ തീര്‍ത്ഥാടകര്‍ക്ക് അവസരമുണ്ടാവില്ല; സൗദിക്കകത്തുള്ള 60,000 പേര്‍ക്ക് അവസരം

ജിദ്ദ: ഈ വര്‍ഷത്തെ ഹജ്ജിന് വിദേശ തീര്‍ത്ഥാടകര്‍ക്ക് അവസരമുണ്ടാവില്ല. സൗദിക്കകത്തുള്ള സ്വദേശികളും വിദേശികളുമായ വാക്‌സിനേഷന്‍ കഴിഞ്ഞ 60,000 പേര്‍ക്കായിരിക്കും ഹജ്ജിനവസരം ഉണ്ടാവുകയെന്ന് ഹജ്ജ് മന്ത്രാലയം അറിയിച്ചതായി എന്‍ഡിടിവി റിപ്പോര്‍ട്ട് ചെയ്തു.

ജൂലൈ അവസാനം മുതല്‍ തീര്‍ത്ഥാടകരെ തിരഞ്ഞെടുക്കാനുള്ള നടപടികള്‍ ആരംഭിക്കും. 65 വയസ്സിന് താഴെയുള്ള മറ്റ് അസുഖകങ്ങള്‍ ഒന്നുമില്ലാത്തവര്‍ക്കാണ് അവസരം നല്‍കുക.

കൊവിഡ് വ്യാപനത്തെ തുടര്‍ന്ന് ഇത് രണ്ടാം തവണയാണ് ഹജ്ജ് തീര്‍ത്ഥാടകരുടെ എണ്ണത്തില്‍ നിയന്ത്രണം കൊണ്ട് വരുന്നത്. 2019 2.5 ദശലക്ഷം തീര്‍ത്ഥാടകര്‍ ഹജ്ജ് കര്‍മം നിര്‍വഹിച്ചപ്പോള്‍ കഴിഞ്ഞ വര്‍ഷം പതിനായിരം പേര്‍ക്ക് മാത്രമാണ് ഹജ്ജ് ചെയ്യാനായത്.

ലോകത്തുടനീളമുള്ള കോവിഡ് മഹാമാരിയുടെ വ്യാപനവും വികാസവും വിലയിരുത്തിയതിന്റെ അടിസ്ഥാനത്തിലാണ് മന്ത്രാലയത്തിന്റെ തീരുമാനം. ഇതുസംബന്ധിച്ച കൂടുതല്‍ വിവരങ്ങള്‍ ഹജ്ജ്, ഉംറ ഉപമന്ത്രി ഉടന്‍ വാര്‍ത്താസമ്മേളനത്തില്‍ അറിയിക്കുമെന്നും മന്ത്രാലയം അറിയിച്ചു.