''രാഹുലിനെതിരെ വെളിപ്പെടുത്തല്‍ നടത്തിയ റിനിയെ ചോദ്യം ചെയ്യണം; കൂടുതല്‍ പരാതിക്കാരുണ്ടെങ്കില്‍ കണ്ടെത്തണം''; മുഖ്യമന്ത്രിക്ക് പരാതി

കൊച്ചി: പാലക്കാട് എംഎല്‍എ രാഹുല്‍ മാങ്കൂട്ടത്തിലിനെതിരേ ഇനിയും പരാതികളുണ്ടാവമെന്ന് പരാാമര്‍ശം നടത്തിയ നടി റിനി ആന്‍ ജോര്‍ജിനെ ചോദ്യം ചെയ്യണമെന്ന് ആവശ്യപ്പെട്ട് പരാതി. ഹൈക്കോടതി അഭിഭാഷകനും പൊതു പ്രവര്‍ത്തകനുമായ അഡ്വ. കുളത്തൂര്‍ ജയ്‌സിങ് ആണ് മുഖ്യമന്ത്രി പിണറായി വിജയന് പരാതി നല്‍കിയത്. റിനി സൂചിപ്പിച്ച അതിജീവിതകളെ കണ്ടെത്തുവാനും നിയമ സഹായവും നീതിയും ഉറപ്പാക്കുവാനും സര്‍ക്കാരിന് സാധിക്കണം. അതിന് അവര്‍ ആരൊക്കെയാണെന്ന് അറിയണം. അത് അറിയാനായി റിനി ആന്‍ ജോര്‍ജിനെ ചോദ്യം ചെയ്യണമെന്ന് ആവശ്യപ്പെട്ടാണ് ജയ്സിങ് മുഖ്യമന്ത്രിക്ക് പരാതി നല്‍കിയിരിക്കുന്നത്.

രാഹുല്‍ മാങ്കൂട്ടത്തില്‍ എംഎല്‍എയെ ലൈംഗിക പീഡന കേസില്‍ പോലിസ് കസ്റ്റഡിയില്‍ എടുത്ത സംഭവത്തിന്റെ പശ്ചാത്തലത്തില്‍ മാധ്യമങ്ങളോട് സംസാരിക്കവെയാണ് അയാളുടെ പീഡനത്തിനിരയായ അതിജീവിതമാര്‍ ഇനിയുമുണ്ടെന്ന പരാമര്‍ശം നടി റിനി ആന്‍ ജോര്‍ജ് നടത്തിയത്.

സ്ത്രീകള്‍ക്ക് നേരെയുള്ള ലൈംഗിക അതിക്രമങ്ങള്‍ ശ്രദ്ധയില്‍പെട്ടാല്‍ അത് മറച്ചുവെക്കുന്ന നടപടി കുറ്റകരമാണ്. ഇനിയും അതിജീവിതകള്‍ ഉണ്ടെന്ന് പറയുന്നതല്ലാതെ അവരുടെ വിവരം സര്‍ക്കാറിനോ പോലിസിനോ നല്‍കിയതായി റിനി ജോര്‍ജ് വ്യക്തമാക്കുന്നില്ല. അതിജീവിതമാരെ കണ്ടെത്തി നീതിയും നിയമസഹായവും ഉറപ്പാക്കാന്‍ റിനിയെ ചോദ്യം ചെയ്ത് മൊഴിയെടുത്ത് തുടര്‍നടപടി സ്വീകരിക്കണമെന്നാണ് പരാതിയിലെ ആവശ്യം.