ഫോണ്‍ ചോര്‍ത്തല്‍ ആരോപണം: മുഖ്യമന്ത്രിക്ക് കത്തയച്ച് ഗവര്‍ണര്‍

തിരുവനന്തപുരം: പി വി അന്‍വര്‍ എംഎല്‍എ ഉയര്‍ത്തിയ ഫോണ്‍ ചോര്‍ത്തല്‍ ആരോപണത്തില്‍ നടപടിയെടുക്കണമെന്ന് ആവശ്യപ്പെട്ട് മുഖ്യമന്ത്രിക്ക് കത്തയച്ച് ഗവര്‍ണര്‍. മന്ത്രിമാരുടെ ഫോണ്‍ ചോര്‍ത്തുന്നത് നിസ്സാര കാര്യമല്ല. ഗൗരവമേറിയതാണ്. വിഷയത്തില്‍ അടിയന്തിര ഇടപെടല്‍ ആവശ്യപ്പെട്ടാണ് ഗവര്‍ണര്‍ കത്തയച്ചത്. ഫോണ്‍ ചോര്‍ത്തിയത് ഗുരുതരമായ നിമലംഘനങ്ങളിലൊന്നാണ്. അത് സുപ്രിം കോടതി വിധികളുടെ ലംഘനം കൂടിയാണെന്നും കത്തില്‍ ചൂണ്ടിക്കാട്ടി. ജില്ലാ പോലിസ് മേധാവിയുടെ ഫോണ്‍ ചോര്‍ത്തല്‍ വിഷയത്തില്‍, അതെങ്ങനെ സംഭവിച്ചെന്നും അന്‍വര്‍ ഫോണ്‍ ചോര്‍ത്തിയോ എന്നും ഗവര്‍ണര്‍ സര്‍ക്കാറിനോട് ചോദിച്ചു. ഫോണ്‍ ചോര്‍ത്തല്‍ സംസ്ഥാനത്ത് വ്യാപകമാകുന്നുവെന്ന ആശങ്കയും ഗവര്‍ണര്‍ കത്തില്‍ പങ്കുവച്ചു.