ജുഡീഷ്യല്‍ കസ്റ്റഡിയിലിരിക്കെ മൊബൈല്‍ ഫോണ്‍ ഉപയോഗം; അര്‍ണബ് ഗോസ്വാമിയെ തലോജ ജയിലിലേക്ക് മാറ്റി

തലോജ: ജുഡീഷ്യല്‍ കസ്റ്റഡിയിലിരിക്കെ മൊബൈല്‍ ഫോണ്‍ ഉപയോഗിച്ചതിന് റിപ്പബ്ലിക് ടിവി എഡിറ്റര്‍ ഇന്‍ ചീഫ് അര്‍നബ് ഗോസ്വാമിയെ തലോജ ജയിലിലേക്ക് മാറ്റി. റായ്ഗഡ് പോലിസാണ് മുംബൈയിലെ തലോജ ജയിലിലേക്ക് മാറ്റിയത്.

വെള്ളിയാഴ്ച വൈകുന്നരത്ത് അര്‍ണബ് സമൂഹികമാധ്യമങ്ങളില്‍ സജീവമായിട്ടുള്ള വിവരം റായ്ഗഡ് ക്രൈംബ്രാഞ്ച് പൊലിസിന്റെ ശ്രദ്ധയില്‍പ്പെട്ടു. മറ്റാരുടേയോ മൊബൈല്‍ ഫോണിലായിരുന്നു അര്‍ണബിന്റെ സമൂഹികമാധ്യമങ്ങളിലെ ഇടപെടല്‍. ബുധനാഴ്ച വറളിയിലെ വസതിയില്‍ നിന്ന് അറസ്റ്റ് ചെയ്യുന്ന സമയത്ത് തന്നെ പൊലീസ് അര്‍ണാബിന്റെ ഫോണ്‍ പിടിച്ചെടുത്തിരുന്നു. അര്‍ണബിന് ഫോണ്‍ ലഭിച്ചത് എങ്ങനെയാണെന്നത് കണ്ടെത്താനുള്ള അന്വേഷണത്തിലാണന്നും പോലിസ് പറഞ്ഞു.

2018 ല്‍ അലിബാഗിലെ സ്‌കൂള്‍ ഇന്റീരിയര്‍ ഡിസൈനറുടെയും അമ്മയുടെയും ആത്മഹത്യക്കേസില്‍ പ്രതിയായ മൂന്ന് പേരില്‍ ഒരാളാണ് ഗോസ്വാമി. റിപ്പബ്ലിക് ടിവിയുടെ സ്റ്റുഡിയോ നിര്‍മ്മാണത്തിന് 83 ലക്ഷം രൂപ അര്‍ണബ് നല്‍കാനുണ്ടായിരുന്നുവെന്ന് നായിക്കിന്റെ ആത്മഹത്യ കുറിപ്പിലുണ്ടായിരുന്നു. തെളിവില്ലെന്ന കാരണം പറഞ്ഞ് കേസേന്വേഷണം ആലിബാഗ് പൊലീസ് അവസാനിപ്പിച്ചിരുന്നു. എന്നാല്‍ അന്‍വയ് നായിക്കിന്റെ ഭാര്യ അടുത്തിടെ നല്‍കിയ പുതിയ പരാതിയെ തുടര്‍ന്നാണ് കേസ് വീണ്ടും പൊലീസ് എടുത്തത്.