കോഴിക്കോട്ടെ തീപിടിത്തം; 75 കോടി രൂപയുടെ നഷ്ടമെന്ന് വിലയിരുത്തല്‍

കോഴിക്കോട്: പുതിയ ബസ്റ്റാന്‍ഡിന് സമീപത്തെ കെട്ടിടത്തിലുണ്ടായ തീപിടിത്തത്തില്‍ 75 കോടി രൂപയുടെ നഷ്ടമുണ്ടായതായി വിലയിരുത്തല്‍. കെട്ടിടത്തിലെ കാലിക്കറ്റ് ടെക്‌സ്‌റ്റൈല്‍സും ഗോഡൗണും പൂര്‍ണമായും കത്തിനശിച്ചു. മൂന്നാം നിലയിലെ കാലിക്കറ്റ് ടെക്സ്റ്റയില്‍സിന്റെ ഗോഡൗണില്‍ മാത്രം 50 കോടിയുടെ നാശനഷ്ടമുണ്ടായിട്ടുണ്ട്. കെട്ടിടത്തില്‍ പ്രവര്‍ത്തിക്കുന്ന മരുന്നു ഗോഡൗണും കത്തിനശിച്ചു.

ഞായറാഴ്ച വൈകിട്ട് 5 മണിക്ക് തുടങ്ങിയ തീയണക്കല്‍ ഫലം കണ്ടത് പുലര്‍ച്ചെ മൂന്നു മണിയോടെയാണ്. അഞ്ചാം മണിക്കൂറില്‍ തീ നിയന്ത്രണ വിധേയമാക്കിയെങ്കിലും തുണി ഗോഡൗണിലെ തീ പുലര്‍ച്ചെ മൂന്ന് മണിക്കാണ് ശമിച്ചത്. അഗ്‌നി രക്ഷാസേനയ്‌ക്കൊപ്പം കരിപ്പൂര്‍ വിമാനത്താവളത്തിലെ ക്രാഷ് ടെഡറും ടോപ് പമ്പിംങ്ങുമാണ് തീ കെടുത്താന്‍ സഹായകരമായത്. പുലര്‍ച്ചെ ഒരുമണിയോടെ മെഡിക്കല്‍ ഷോപ്പിന് മുകളില്‍ വീണ്ടും തീ ഉയര്‍ന്നെങ്കിലും അഗ്‌നിരക്ഷാസേനയ്ക്ക് നിയന്ത്രിക്കാനായി. കരിപ്പൂര്‍ വിമാനത്താവളത്തിലെ അഗ്‌നിരക്ഷാസേന ഉള്‍പ്പെടെ പതിനഞ്ച് യൂണിറ്റുകള്‍ ഇന്നലെ തീ അണയ്ക്കാനായെത്തി. തീപിടുത്തത്തിന്റെ കാരണം അന്വേഷിച്ച് കണ്ടെത്തി രണ്ട് ദിവസത്തിനകം റിപ്പോര്‍ട്ട് സമര്‍പ്പിക്കാന്‍ ജില്ല കലക്ടര്‍ക്ക് ചീഫ് സെക്രട്ടറി നിര്‍ദേശം നല്‍കി.