കലാരാജുവിനെ തട്ടിക്കൊണ്ടുപോയ സിപിഎം പ്രവര്‍ത്തകര്‍ക്ക് ജാമ്യം; ചുവന്ന മാലയിട്ട് സ്വീകരിച്ചു

കൊച്ചി: കൂത്താട്ടുകുളം നഗരസഭയിലെ സിപിഎം കൗണ്‍സിലര്‍ കലാരാജുവിനെ തട്ടിക്കൊണ്ടുപോയെന്ന കേസില്‍ ജാമ്യത്തില്‍ ഇറങ്ങിയ സിപിഎം പ്രവര്‍ത്തകര്‍ക്ക് സ്വീകരണം നല്‍കി പാര്‍ട്ടി. സിപിഎം ചെള്ളക്കാപ്പടി ബ്രാഞ്ച് സെക്രട്ടറി അരുണ്‍ വി മോഹന്‍, പ്രവര്‍ത്തകരായ സജിത്ത് എബ്രഹാം, റിന്‍സ് വര്‍ഗീസ്, ടോണി ബേബി എന്നിവരെയാണ് മൂവാറ്റുപുഴ സബ്ജയിലിന് മുന്നില്‍ ചുവന്ന മാലയിട്ട് സ്വീകരിച്ചത്.

നഗരസഭയിലെ എല്‍ഡിഎഫ് ഭരണസമിതിക്കെതിരേ യുഡിഎഫ് കൊണ്ടുവന്ന അവിശ്വാസപ്രമേയത്തിന് അനുകൂലമായി വോട്ടുചെയ്യാനെത്തിയപ്പോഴാണ് സ്വന്തം കൗണ്‍സിലറായ കലാ രാജുവിനെ സിപിഎം പ്രവര്‍ത്തകര്‍ കടത്തിക്കൊണ്ടുപോയത്. ഇവരുടെ പരാതിയില്‍ എടുത്ത കേസിലാണ് ഇവരെല്ലാം അറസ്റ്റിലായിരുന്നത്.

സിപിഎം ഏരിയാ സെക്രട്ടറി പി ബി. രതീഷ്, നഗരസഭാ ചെയര്‍പേഴ്‌സണ്‍ വിജയ ശിവന്‍, വൈസ് ചെയര്‍മാന്‍ സണ്ണി കുര്യാക്കോസ്, കൗണ്‍സിലര്‍ സുമ വിശ്വംഭരന്‍, സിപിഎം ലോക്കല്‍ സെക്രട്ടറി ഫെബീഷ് ജോര്‍ജ് എന്നിവര്‍ ഉള്‍പ്പെടെ 45 പേര്‍ പ്രതികളാണ്.