കപ്പലുകളെ തകര്‍ക്കാന്‍ ശേഷിയുള്ള ചൈനീസ് മിസൈലുകള്‍ വാങ്ങാന്‍ ഇറാന്‍

യുഎസ് ഇറാന്‍ സംഘര്‍ഷം മുറുകുന്നതിനിടെ ചൈനയില്‍ നിന്നും മിസൈലുകള്‍ വാങ്ങാനുള്ള നീക്കവുമായി ഇറാന്‍. ചൈന നിര്‍മ്മിച്ച CM302 എന്ന അത്യാധുനിക മിസൈലുകള്‍ വാങ്ങാനാണ് ഇറാന്റെ നീക്കം. ശബ്ദത്തേക്കാള്‍ വേഗത്തില്‍ സഞ്ചരിക്കുന്ന ഈ മിസൈലുകള്‍ക്ക് കടലിലെ കപ്പലുകളെ കൃത്യമായി തകര്‍ക്കാന്‍ ശേഷിയുണ്ട്. CM-302 മിസൈലിന് ശബ്ദത്തേക്കാള്‍ മൂന്നിരട്ടി വേഗത്തില്‍ സഞ്ചരിക്കാന്‍ കഴിയും.

ഏകദേശം 290 കിലോമീറ്റര്‍ ദൂരെയുള്ള ലക്ഷ്യങ്ങളെ തകര്‍ക്കാന്‍ ഇതിന് കഴിയും. കപ്പലുകളിലുള്ള മിസൈല്‍ പ്രതിരോധ സംവിധാനങ്ങളെ വെട്ടിച്ച് മുന്നേറാന്‍ ഇതിന് പ്രത്യേക കഴിവുണ്ട്.

ഇറാന്‍ ഈ മിസൈലുകള്‍ സ്വന്തമാക്കുന്നത് തങ്ങളുടെ കപ്പലുകള്‍ക്ക് ഭീഷണിയാണെന്ന് അമേരിക്ക കരുതുന്നു. ഇതിനെത്തുടര്‍ന്ന് അമേരിക്ക തങ്ങളുടെ നാവികസേനയെ ഇറാന് സമീപമുള്ള കടല്‍ മേഖലയിലേക്ക് കൂടുതല്‍ കരുത്തോടെ അയച്ചിരിക്കുകയാണ്. ഒരു വശത്ത് ചൈനയുടെ സഹായത്തോടെ ഇറാന്‍ കരുത്താര്‍ജ്ജിക്കുന്നു, മറുവശത്ത് അമേരിക്ക സൈന്യത്തെ അണിനിരത്തുന്നു. ഇത് ആ മേഖലയില്‍ ഒരു യുദ്ധസാധ്യതയെക്കുറിച്ചുള്ള ഭീതി വര്‍ദ്ധിപ്പിക്കുന്നു.

ലോകത്തെ എണ്ണക്കപ്പലുകള്‍ കടന്നുപോകുന്ന പ്രധാന പാതയായ 'ഹോര്‍മുസ് ഇടുക്ക്' ഇറാന്റെ നിയന്ത്രണത്തിലാണ്. ഈ മിസൈലുകള്‍ അവിടെ വിന്യസിച്ചാല്‍ ഏത് കപ്പലിനെയും തടയാന്‍ ഇറാന് സാധിക്കും.അമേരിക്കയുടെ വലിയ വിമാനവാഹിനി കപ്പലുകള്‍ക്ക് ഈ മിസൈല്‍ വലിയൊരു ഭീഷണിയാണ്. ആധുനിക മിസൈലുകള്‍ കൈവശമുണ്ടാകുന്നത് വലിയ സൈനിക ശക്തികള്‍ക്കെതിരെ പോരാടാന്‍ ഇറാനെ സഹായിക്കും.