ആറു മാസം മുമ്പ് 'തുടച്ചുനീക്കിയ' ഹമാസിന്റെ റഫാ ബ്രിഗേഡിനെ ഇല്ലാതാക്കണമെന്ന് ഇസ്രായേല്‍ സൈനിക മേധാവി

ഗസ സിറ്റി: ഗസയിലെ റഫയിലെ അല്‍ഖസ്സം ബ്രിഗേഡിനെ പരാജയപ്പെടുത്താന്‍ സയണിസ്റ്റ് സൈനികര്‍ക്ക് നിര്‍ദേശം നല്‍കി ഇസ്രായേലി സൈനിക മേധാവി ഇയാല്‍ സാമിര്‍. മൊറാഗ് പ്രദേശത്ത് ക്യാംപ് ചെയ്യുന്ന സയണിസ്റ്റ് സൈനികരെ നേരില്‍ കണ്ടാണ് ഇയാല്‍ സാമിര്‍ ഈ ആവശ്യം ഉന്നയിച്ചത്. ഗസയില്‍ പുതുതായി സ്ഥാപിച്ച കേന്ദ്രത്തില്‍ പ്രവര്‍ത്തിക്കുന്ന 36ാം ഡിവിഷനിലെ കമാന്‍ഡര്‍മാരുമായും സൈനികരുമായും സമീര്‍ സംസാരിച്ചതായും നിലവിലുള്ള പ്രവര്‍ത്തന പദ്ധതികള്‍ക്ക് അംഗീകാരം നല്‍കിയതായും ഇസ്രായേല്‍ സൈന്യം പറഞ്ഞു. സതേണ്‍ കമാന്‍ഡ് ചീഫ് മേജര്‍ ജനറല്‍ യാരോണ്‍ ഫിങ്കല്‍മാന്‍, 36ാം ഡിവിഷന്‍ കമാന്‍ഡര്‍ ബ്രിഗേഡിയര്‍ ജനറല്‍ മൊറാന്‍ മര്‍ തുടങ്ങിയവരുമായാണ് ഇയാല്‍ സാമിര്‍ ചര്‍ച്ച നടത്തിയിരിക്കുന്നത്.

റഫയിലെ അല്‍ ഖസ്സം ബ്രിഗേഡിനെ തുടച്ചുനീക്കിയതായി 2024 സെപ്റ്റംബറില്‍ ഇസ്രായേല്‍ പ്രഖ്യാപിച്ചിരുന്നു. എന്നാല്‍, ഒരു വര്‍ഷത്തില്‍ അധികം നീണ്ടുനിന്ന അധിനിവേശത്തില്‍ റഫാ ബ്രിഗേഡിന് കാര്യമായ നഷ്ടമൊന്നുമുണ്ടായിരുന്നില്ല. കൂടാതെ വെടിനിര്‍ത്തല്‍ കരാര്‍ പ്രാബല്യത്തിലുള്ള സമയത്ത് ബ്രിഗേഡ്‌സ് ശക്തിയും പ്രദര്‍ശിപ്പിച്ചു. ഇതോടെ ഇസ്രായേലി പ്രചാരണ തന്ത്രങ്ങള്‍ പൊളിഞ്ഞുവീണു.