കരിപ്പൂരില്‍ നിന്നും എട്ട് വിമാനങ്ങള്‍ കൂടി; ഹജ്ജ് ക്യാമ്പ് ബുധനാഴ്ച സമാപിക്കും

മലപ്പുറം: സംസ്ഥാന ഹജ്ജ് കമ്മിറ്റി മുഖേന ഹജ്ജിന് പോവാന്‍ കരിപ്പൂരില്‍ നിന്നും അവശേഷിക്കുന്നത് എട്ട് വിമാന സര്‍വ്വീസുകള്‍. തിങ്കള്‍, ചൊവ്വ ദിവസങ്ങളില്‍ രണ്ട് വീതവും ബുധനാഴ്ച മൂന്ന്, വ്യാഴാഴ്ച പുലര്‍ച്ചെ ഒന്ന് എന്നിങ്ങനെയാണ് ബാക്കിയുള്ള സര്‍വ്വീസുകള്‍. അവസാന വിമാനം വ്യാഴാഴ്ച പുലര്‍ച്ചെ ഒരു മണിക്കാണ്. ഇതിലേക്കുള്ള തീര്‍ത്ഥാടകര്‍ ബുധനാഴ്ച രാവിലെ പത്ത് മണിക്ക് ക്യാമ്പിലെത്തി രാത്രി എട്ട് മണിയോടെ എയര്‍പോര്‍ട്ടിലേക്ക് തിരിക്കും. ഇതോടെ കരിപ്പൂരിലെ ഹജ്ജ് ക്യാമ്പിന് പരിസമാപ്തിയാവും. മെയ് ഒമ്പതിനാണ് ക്യാമ്പ് ആരംഭിച്ചത്.

കരിപ്പൂരില്‍ നിന്നും ഇന്ന് രണ്ട് വിമാനങ്ങളിലായി 346 പേര്‍ പുറപ്പെട്ടു. പുലര്‍ച്ചെ 12.30ന് പുറപ്പെട്ട വിമാനത്തില്‍ 87 പുരുഷന്മാരും 86 സ്ത്രീകളും വൈകുന്നേരം 4.50ന് പുറപ്പെട്ട വിമാനത്തില്‍ 85 പുരുഷന്മാരും 88 സ്ത്രീകളുമാണ് യാത്രയായത്. കരിപ്പൂരില്‍ നിന്നും ഇത് വരെ 23 വിമാനങ്ങളിലായി 3,967 തീര്‍ത്ഥാടകര്‍ മക്കയിലെത്തി.

കരിപ്പൂരില്‍ നിന്നും തിങ്കളാഴ്ച പുലര്‍ച്ചെ ഒരു മണിക്ക് പുറപ്പെടുന്ന വിമാനത്തില്‍ 74 പുരുഷന്മാരും 92 സ്ത്രീകളും വൈകുന്നേരം 5.30ന് പുറപ്പെടുന്ന വിമാനത്തില്‍ 82 പുരുഷന്മാരും 91 സ്ത്രീകളുമാണ് പുറപ്പെടുക.കണ്ണൂരില്‍ നിന്നും നാളെ പുലര്‍ച്ചെ അഞ്ച് മണിക്കാണ് സര്‍വ്വീസ്. ചൊവ്വാഴ്ച കണ്ണൂരില്‍ നിന്നും ഹജ്ജ് സര്‍വ്വീസുകളില്ല.

കരിപ്പൂരില്‍ ഇന്ന് തിങ്കളാഴ്ച വിവിധ സമയങ്ങളില്‍ നടന്ന യാത്രയയപ്പ് സംഗമങ്ങളില്‍ എ പി അനില്‍ കൂമാര്‍ എംഎല്‍എ, സംസ്ഥാന ന്യൂനപക്ഷ കമ്മീഷന്‍ അംഗം എ സൈഫുദ്ധീന്‍ ഹാജി, ഹജ്ജ് കമ്മിറ്റി ചെയര്‍മാന്‍ ഡോ. ഹുസൈന്‍ സഖാഫി ചുള്ളിക്കോട് നേതൃത്വം നല്‍കി. ഹജ്ജ് കമ്മിറ്റി മെമ്പര്‍മാരായ കെ ഉമര്‍ ഫൈസി മുക്കം, അഷ്‌കര്‍ കോറാട്, അസി.സെക്രട്ടറി ജാഫര്‍ കക്കൂത്ത്, ഹസന്‍ സഖാഫി തറയിട്ടാല്‍, യൂസുഫ് പടനിലം സംബന്ധിച്ചു.

കൊച്ചി എംബാര്‍ക്കേഷന്‍ പോയിന്റ് വഴി ഇത് വരെ അഞ്ച് വിമാനങ്ങളിലായി 1,436 തീര്‍ത്ഥാടകര്‍ മക്കയിലെത്തി. ഇതില്‍ 444 പേര്‍ പുരുഷന്മാരും 992 പേര്‍ വനിതകളുമാണ്. ശനിയാഴ്ച രാത്രി പുറപ്പെട്ട വിമാനത്തിലും ഞായറാഴ്ച രാവിലെ പുറപ്പെട്ട വിമാനത്തിലും വനിതാ തീര്‍ത്ഥാടകര്‍ (572) മാത്രമാണ് യാത്രയായത്. വനിതാ തീര്‍ത്ഥാടകര്‍ക്കു മാത്രമായുള്ള അവസാനത്തെ വിമാനം 21ന് രാവിലെ 11.30 ന് പുറപ്പെടും. മൂന്ന് വിമാനങ്ങളാണ് വനിതകള്‍ക്ക് മാത്രമായി കൊച്ചിയില്‍ നിന്നും ഷെഡ്യൂള്‍ ചെയ്തിട്ടുള്ളത്.

ഇന്ന് വൈകുന്നേരം 3.27 ന് പുറപ്പെട്ട എസ്.വി 3063 നമ്പര്‍ വിമാനത്തില്‍ 152 പുരുഷന്മാരും 137 സ്ത്രീകളുമാണ് യാത്രയായത്. തിങ്കളാഴ്ച ഒരു വിമാനമാണുള്ളത്. ഇതില്‍ 284 പേരാണ് യാത്രയാവുക.

അതേ സമയം ലക്ഷദ്വീപില്‍ നിന്നുള്ള തീര്‍ത്ഥാടക സംഘം തിങ്കളാഴ്ച ഹജ്ജ് ക്യാമ്പിലെത്തും. ചൊവ്വാഴ്ച രാത്രി 8.20ന് പുറപ്പെടുന്ന എസ്. വി 3067 നമ്പര്‍ വിമാനത്തിലാണ് ഇവര്‍ യാത്രയാവുക. 58 പുരുഷന്മാരും 54 സ്ത്രീകളും അടക്കം 112 പേരാണ് ലക്ഷദ്വീപില്‍ നിന്നുള്ളത്. ഇവരുടെ സേവനത്തിനായി ഒരു ഹജ്ജ് ഇന്‍സ്‌പെക്ടറും ഉണ്ട്. ലക്ഷ്വദീപില്‍ നിന്നുള്ള സംഘത്തെ ഹജ്ജ് കമ്മിറ്റിയുടേയും സംഘാടക സമിതിയുടേയും നേതൃത്വത്തില്‍ ക്യാമ്പില്‍ സ്വീകരിക്കും.