രാജ്യത്ത് 20,346 പേര്‍ക്കു കൂടി കൊവിഡ്: പ്രതിദിന കണക്കില്‍ കേരളം ഒന്നാമത്

ന്യൂഡല്‍ഹി: രാജ്യത്ത് കഴിഞ്ഞ 24 മണിക്കൂറിനിടെ 20,346 പേര്‍ക്ക് കൊവിഡ് സ്ഥിരീകരിച്ചു. ഇതോടെ ആകെ കൊവിഡ് ബാധിതരുടെ എണ്ണം 1,03,95,278 ആയി. നിലവില്‍ 2,28,083 പേരാണ് ഇനി ചികിത്സയിലുള്ളത്. ഇതുവരെ 1,00,16,859 പേര്‍ രോഗമുക്തരായി. 24 മണിക്കൂറിനിടെ 19,587 പേരാണ് രോഗമുക്തരായത്. 222 മരണം റിപോര്‍ട്ട് ചെയ്തു. 1,50,336 ഇതുവരെ മരിച്ചു.

24 മണിക്കൂറിനിടെ ഏറ്റവും കൂടുതല്‍ രോഗം സ്ഥിരീകരിച്ചത് കേരളത്തിലാണ്. ഇന്നലെ 6,394 പേര്‍ക്കാണ് രോഗം സ്ഥിരീകരിച്ചത്. മഹാരാഷ്ട്രയില്‍ ഇതുവരെ 1,954,553 പേര്‍ക്കാണ് രോഗം ബാധിച്ചത്. കര്‍ണാടകയില്‍ 924,137ഉം ആന്ധ്രാപ്രദേശില്‍ 883,876ഉം തമിഴ്‌നാട്ടില്‍ 823,181 ഉം കേരളത്തില്‍ 790,882 പേര്‍ക്കും ഇതുവരെ രോഗം ബാധിച്ചു. രാജ്യത്ത് ഇതുവരെ 17,84,00,995 സാംപിളുകളാണ് പരിശോധിച്ചത്. ഇന്നലെ മാത്രം 9,37,590 സാംപിളുകള്‍ പരിശോധിച്ചതായും ഐസിഎംആര്‍ അറിയിച്ചു.