ജോലിക്കിടെ വയലില്‍ നമസ്‌കരിച്ചതിന് ക്രൂരമര്‍ദനം; ഹിന്ദുത്വ പ്രവര്‍ത്തകനെതിരേ നടപടി ആവശ്യപ്പെട്ട് പ്രദേശവാസികള്‍ (വീഡിയോ)

ജോലിക്കിടെ മുസ്‌ലിം തൊഴിലാളി വയലില്‍ നമസ്‌കരിച്ചതിന് ക്രൂരമായി മര്‍ദിച്ച സംഭവത്തില്‍ നടപടി ആവശ്യപ്പെട്ട് പ്രദേശവാസികള്‍ ഉള്‍പ്പടെ നിരവധി പേര്‍ രംഗത്തെത്തി. ഉത്തരാഖണ്ഡിലെ രുദ്രാപൂരില്‍ നടന്ന ആക്രമണത്തിന്റെ ദൃശ്യങ്ങള്‍ സാമൂഹിക മാധ്യമങ്ങളില്‍ വൈറലായതിനെ തുടര്‍ന്നാണ് പ്രതിഷേധം ഉയര്‍ന്നത്. കഴിഞ്ഞ ദിവസമാണ് വയലില്‍ നമസ്‌കരിച്ചു കൊണ്ടിരുന്ന തൊഴിലാളിയെ ഒരാള്‍ തള്ളി താഴെയിടുന്നതും തുടര്‍ന്ന് ചവിട്ടുന്നതുമായ വീഡിയോ സാമൂഹിക മാധ്യമങ്ങളില്‍ പ്രചരിച്ചത്. ജയ് ശ്രീരാം വിളിക്കാന്‍ നിര്‍ബന്ധിക്കുകയും മാപ്പ് പറയിക്കുന്നതും വീഡിയോയിലര്‍ കാണാം. രുദ്രാപൂരിലെ ഒരു ക്ഷേത്രത്തിന്റെ മാനേജരായ അരവിന്ദ് ശര്‍മയാണ് തൊഴിലാളിയെ ക്രൂരമായി മര്‍ദിച്ചത്.

'ഞാന്‍ ഒരു കൂലിത്തൊഴിലാളിയാണ്. സമീപത്ത് ജോലി ചെയ്യുന്നു. ഇത് റമദാന്‍ മാസമാണ്. പള്ളി ഇവിടെ നിന്ന് അല്‍പ്പം അകലെയാണ്, ദൂരെയുള്ള പള്ളിയില്‍ പോകുന്നത് എന്റെ ജോലിയെ ബാധിക്കുന്നു. അതുകൊണ്ടാണ് കഴിഞ്ഞ മൂന്ന് ദിവസമായി ഞാന്‍ ആ ഒഴിഞ്ഞ വയലില്‍ ളുഹര്‍ നമസ്‌കാരം നിര്‍വ്വഹിക്കുന്നത്. പ്രദേശവാസികള്‍ ആരും ഇതുവരെ എതിര്‍ത്തില്ല. എന്നാല്‍ ഇന്നലെ പെട്ടെന്ന് ഒരാള്‍ വന്ന് ആക്രമിക്കുകയായിരുന്നു. പ്രാര്‍ത്ഥന പൂര്‍ത്തിയാക്കാന്‍ പോലും അനുവദിക്കാതെയാണ് എന്നെ ചവിട്ടി താഴെയിട്ടത്. നമസ്‌കാരത്തിനിടെ എന്നെ ക്രൂരമായി മര്‍ദ്ദിക്കുകയും ചെയ്തു.' അക്രമത്തിനിരയായ തൊഴിലാളി പറഞ്ഞു.

വിദ്വേഷ ആക്രമണത്തിനെതിരേ പ്രദേശവാസികളും രംഗത്തെത്തി. ഇത്തരം പ്രവൃത്തികളിലൂടെ രാജ്യത്തിന്റെ ഐക്യവും അഖണ്ഡതയും തകര്‍ക്കാന്‍ ശ്രമിക്കുന്നവരെ ഉടന്‍ അറസ്റ്റ് ചെയ്ത് ജയിലിലടയ്ക്കണമെന്ന് പ്രദേശവാസികള്‍ ആവശ്യപ്പെട്ടു.

അക്രമി അരവിന്ദ് ശര്‍മ്മയ്ക്കെതിരെ സെക്ഷന്‍ 302 പ്രകാരം നേരത്തെ മറ്റൊരു കേസ് നിലവിലുണ്ട്. ജീവപര്യന്തം തടവിന് ശിക്ഷിക്കപ്പെട്ടിട്ടുണ്ട് എന്നാണ് റിപ്പോര്‍ട്ട്. പരോളില്‍ പുറത്തിറങ്ങിയതിന് ശേഷമാണ് ഈ ആക്രമണം. തൊഴിലാളിയെ മര്‍ദിച്ച സംഭവത്തില്‍ ഉത്തരാഖണ്ഡ് പോലിസിന് പരാതി നല്‍കിയിട്ടുണ്ടെങ്കിലും ഇതുവരെ നടപടി സ്വീകരിച്ചിട്ടില്ല. അതേസമയം, കുറ്റക്കാര്‍ക്കെതിരേ ശക്തമായ നടപടി സ്വീകരിക്കുമെന്ന് പോലിസ് അറിയിച്ചു. ആവശ്യമായ നിയമനടപടികള്‍ ആരംഭിച്ചിട്ടുണ്ടെന്നും അന്വേഷണം തുടരുകയാണെന്നും ക്രൈം/ട്രാഫിക് എസ്പി ജിതേന്ദ്ര ചൗധരി മാധ്യമങ്ങള്‍ക്ക് നല്‍കിയ പ്രസ്താവനയില്‍ പറഞ്ഞു.