കെനിയയില്‍ വിഷ ഫോസ്ഫറസ് ഉപയോഗിക്കുന്നത് നിര്‍ത്തിയെന്ന് ബ്രിട്ടന്‍

നെയ്‌റോബി: ആഫ്രിക്കന്‍ രാജ്യമായ കെനിയയില്‍ വിഷ ഫോസ്ഫറസ് ഉപയോഗിക്കുന്നത് നിര്‍ത്തിയെന്ന് ബ്രിട്ടന്‍. സൈനിക പരിശീലനത്തിന്റെ ഭാഗമായി ബ്രിട്ടീഷ് സൈന്യം ഉപയോഗിച്ച ഫോസ്ഫറസ് കര്‍ഷകര്‍ക്കും കൃഷി ഭൂമിക്കും വലിയ പ്രശ്‌നങ്ങളുണ്ടാക്കിയെന്ന 2022ലെ റിപോര്‍ട്ടിന്റെ അടിസ്ഥാനത്തിലാണ് നടപടി. തെക്കന്‍ കെനിയയിലെ ജനവാസ മേഖലകളിലും മറ്റും ബ്രിട്ടീഷ് സൈന്യം വ്യാപകമായി ഫോസ്ഫറസ് ഉപയോഗിച്ചു. ഇത് നിരവധി കര്‍ഷകരെ പ്രതികൂലമായി ബാധിച്ചു. കൂടാതെ കൃഷിഭൂമി ഉപയോഗ ശൂന്യമാവുകയും ചെയ്തു. ബ്രിട്ടീഷ് സൈന്യം ഉപേക്ഷിച്ച സ്‌ഫോടകവസ്തുക്കള്‍ പൊട്ടിത്തെറിച്ച് നിരവധി കെനിയക്കാര്‍ക്ക് പരിക്കേല്‍ക്കുകയും ചെയ്തിട്ടുണ്ട്.

നിലവില്‍ അതിശക്തമായ സ്‌ഫോടകവസ്തുക്കള്‍ ഉപയോഗിച്ചാണ് ബ്രിട്ടീഷ് സൈന്യം കെനിയയില്‍ പരിശീലനം നടത്തുന്നത്. യുക്രൈനും റഷ്യയും തമ്മിലുള്ള യുദ്ധത്തില്‍ ആര്‍ട്ടിലറികളും മറ്റും വ്യാപകമായി ഉപയോഗിക്കുന്നതാണ് ഇതിന് കാരണം. കൂടാതെ കിടങ്ങ് യുദ്ധവും നടക്കുന്നു. 1963 വരെ ബ്രിട്ടന്റെ കോളനിയായിരുന്നു കെനിയ. ഇപ്പോഴും കെനിയയില്‍ സായുധപരിശീലനം നടത്താന്‍ ബ്രിട്ടീഷ് സൈന്യത്തിന് അധികാരമുണ്ട്. കെനിയയുമായി ഒപ്പിട്ട കരാറിന്റെ അടിസ്ഥാനത്തിലാണ് ഇത് നടക്കുന്നത്.