ദലിത് എഞ്ചിനീയറെ ആക്രമിച്ച പ്രവര്‍ത്തകന് സ്വീകരണം നല്‍കി ബിജെപി

ലഖ്‌നോ: സര്‍ക്കാര്‍ സര്‍വീസിലെ ദലിത് എഞ്ചിനീയറെ മര്‍ദ്ദിച്ച കേസില്‍ ജയിലില്‍ പോയ പ്രവര്‍ത്തകന് വന്‍ സ്വീകരണം നല്‍കി ബിജെപി. ഉത്തര്‍പ്രദേശിലെ ബല്ലിയ സ്വദേശിയായ മുന്ന ബഹദൂര്‍ സിങിനാണ് ജയിലിന് സമീപം ബിജെപി നേതാക്കള്‍ അടക്കമുള്ളവര്‍ സ്വീകരണം നല്‍കിയത്. ആഗസ്റ്റ് 23നാണ് മുന്ന ബഹദൂര്‍ സിങ് അടക്കമുള്ള ബിജെപി സംഘം ദലിത് വിഭാഗത്തില്‍ നിന്നുള്ള എഞ്ചിനീയറായ ലാല്‍ ജി സിങിനെ ആക്രമിച്ചത്. സ്റ്റേറ്റ് പവര്‍ കോര്‍പറേഷനിലെ എഞ്ചിനീയറായിരുന്നു ലാല്‍ ജി സിങ്. ആക്രമിച്ച ശേഷം ചെരുപ്പ് ഉപയോഗിച്ച് അടിക്കുകയും ചെയ്തു. തുടര്‍ന്നാണ് മുന്ന ബഹദൂര്‍ സിങിനെ ജയിലില്‍ അടച്ചത്. ഇയാള്‍ ജയിലില്‍ നിന്നും ഇറങ്ങുന്നതിന് മുമ്പ് തന്നെ മുതിര്‍ന്ന ബിജെപി നേതാക്കളായ രാം ഇഖ്ബാല്‍ സിങ് അടക്കമുള്ളവര്‍ അനുകൂലമായ പോസ്റ്റുകളിട്ടു.