മൻസുഖ് ഹിരേൻ വധം: സച്ചിൻ വാസെ മുഖ്യപ്രതി; കേസവസാനിപ്പിച്ചതായി എടിഎസ്

മുംബൈ: മൻസുഖ് ഹിരേൻ കൊലപാതക കേസ് ദേശീയ അന്വേഷണ ഏജൻസിക്ക് കൈമാറുമെന്ന് ആഭ്യന്തര മന്ത്രാലയം അറിയിച്ചതിന് തൊട്ടുപിന്നാലെ മഹാരാഷ്ട്ര തീവ്രവാദ വിരുദ്ധ സ്ക്വാഡ് കേസ് അന്വേഷണം അവസാനിപ്പിച്ചു.

മഹാരാഷ്ട്ര തീവ്രവാദ വിരുദ്ധ സ്ക്വാഡ് ഡിഐജി ശിവദീപ് ലാൻഡെ തന്റെ സാമൂഹിക മാധ്യമം വഴിയാണ് കേസ് പരിഹരിച്ചെന്നും മുഖ്യപ്രതി സച്ചിൻ വാസെയാണെന്നും അറിയിച്ചത്. മൻസുഖ് ഹിരേൻ കൊലപാതക കേസ് ഞങ്ങൾ പരിഹരിച്ചു. രാവും പകലും ജോലി ചെയ്യുകയും ഫലങ്ങൾ നേടുകയും ചെയ്ത എന്റെ എടിഎസ് ഉദ്യോഗസ്ഥരെ എന്റെ ഹൃദയത്തിന്റെ ഉള്ളിൽ നിന്ന് അഭിവാദ്യം ചെയ്യുന്നു. എന്റെ സർവീസിലെ ഏറ്റവും വിഷമകരമായ കേസുകളിൽ ഒന്നാണിതെന്ന് അദ്ദേഹം കുറിച്ചു.

കൊലപാതകത്തിൽ പങ്കുണ്ടെന്ന് ആരോപിച്ച് നരേഷ് ഗോർ (31), വിനായക് ഷിൻഡെ (51) എന്നിവരെ എടിഎസ് അറസ്റ്റ് ചെയ്തതിന് ശേഷമാണ് ലാൻഡെ ഇക്കാര്യം പോസ്റ്റ് ചെയ്തത്. ഗോർ ഒരു ക്രിക്കറ്റ് വാതുവെപ്പുകാരനാണ്, 2006 ൽ ഛോട്ടാ രാജന്റെ സഹായിയായ ലഖാൻ ഭയ്യയെ വ്യാജ ഏറ്റുമുട്ടലിൽ വധിച്ചതിന് കുറ്റക്കാരനെന്ന് കണ്ടെത്തിയ കോൺസ്റ്റബിളാണ് ഷിൻഡെ.

ഇരുവരെയും ഞായറാഴ്ച താനെ കോടതി പോലിസ് കസ്റ്റഡിയിൽ വിട്ടു. സസ്പെൻഡ് ചെയ്ത അസിസ്റ്റന്റ് പോലിസ് ഇൻസ്പെക്ടർ സച്ചിൻ വാസെയാണ് കേസിലെ പ്രധാന പ്രതി. കേസ് എൻ‌ഐ‌എയ്ക്ക് കൈമാറാൻ കേന്ദ്ര ആഭ്യന്തര മന്ത്രാലയം ഉത്തരവിട്ടെങ്കിലും കേസ് കൈമാറുന്നത് സംബന്ധിച്ച ഔദ്യോഗിക ഉത്തരവുകൾ ഇനിയും ലഭിച്ചിട്ടില്ലെന്ന് എടി‌എസ് അധികൃതർ പറഞ്ഞു.

കേസിൽ കണ്ടെത്തിയ സാങ്കേതിക തെളിവുകളുടെ അടിസ്ഥാനത്തിലാണ് ഗോറിനെയും ഷിൻഡെയും അറസ്റ്റ് ചെയ്തതെന്ന് എടിഎസ് വൃത്തങ്ങൾ അറിയിച്ചു. കച്ച് നിവാസിയായ ഗോർ ഗുജറാത്തിൽ നിന്ന് അനധികൃതമായി എട്ട് സിം കാർഡുകൾ വാങ്ങി ഷിൻഡെക്ക് കൈമാറി. ഷിൻഡെ ഒരു മധ്യസ്ഥനായി പ്രവർത്തിക്കുകയും സിം കാർഡുകൾ സച്ചിൻ വാസേക്ക് കൈമാറുകയും ചെയ്തു.

ഫെബ്രുവരി ആദ്യ വാരം സിം കാർഡുകൾ വാസേക്ക് കൈമാറിയതായി ഒരു പോലിസ് ഉദ്യോഗസ്ഥൻ പറഞ്ഞു. ലഖാൻ ഭയ്യ വ്യാജ ഏറ്റുമുട്ടൽ കേസിൽ പ്രതിയായതിനാൽ ഷിൻഡെയെ സേനയിൽ നിന്ന് നേരത്തെ പുറത്താക്കിയിരുന്നു. ജീവപര്യന്തം തടവ് അനുഭവിക്കുകയായിരുന്നു. കൊവിഡ് പകർച്ചവ്യാധി വ്യാപനം മൂലം 2020 മെയ് മാസത്തിൽ അദ്ദേഹം പരോളിൽ പുറത്തിറങ്ങിയിരുന്നു.

താനെയിലെ ഇന്റീരിയർ കാർ ഡെക്കോർ ഷോപ്പിന്റെ ഉടമയായ ഹിരേനെ (46) മാർച്ച് 5 ന് രതി ബന്ദറിനടുത്തുള്ള കൽവ ക്രീക്കിൽ മരിച്ച നിലയിൽ കണ്ടെത്തുകയായിരുന്നു. ഹിരേന്റെ സ്കോർപിയോ കാർ കഴിഞ്ഞ മാസം മുകേഷ് അംബാനിയുടെ വസതിയായ ആന്റിലിയയ്ക്ക് പുറത്ത് സ്ഫോടക വസ്തുക്കളുമായി കണ്ടെത്തിയിരുന്നു.