പൂഞ്ചില്‍ സൈന്യവും സായുധരും തമ്മില്‍ ഏറ്റുമുട്ടല്‍; ഒരാള്‍ കൊല്ലപ്പെട്ടതായി സൂചന

ശ്രീനഗര്‍: പൂഞ്ചില്‍ സൈന്യവും സായുധരും തമ്മില്‍ ഏറ്റുമുട്ടല്‍. മൂന്ന് സായുധര്‍ ഒളിച്ചിരിക്കുന്നുവെന്ന വിവരത്തെ തുടര്‍ന്നാണ് പൂഞ്ചിലെ സൂരന്‍കോട്ടില്‍ സുരക്ഷാ സൈന്യം തിരച്ചില്‍ നടത്തിയത്. തിരച്ചിലിനിടെ ഇവര്‍ സൈന്യത്തിന് നേരെ വെടിയുതിര്‍ക്കുകയായിരുന്നു. വനമേഖയില്‍ നടന്ന ഏറ്റുമുട്ടലില്‍ ഒരാള്‍ കൊല്ലപ്പെട്ടതായി റിപ്പോര്‍ട്ടുണ്ട്. കൂടുതല്‍ വിവരങ്ങള്‍ പുറത്തുവിട്ടിട്ടില്ല.ഇതിനിടെ, ശ്രീനഗറില്‍ ഇന്നലെയുണ്ടായ ഏറ്റുമുട്ടലില്‍ പരിക്കേറ്റ ഒരു പോലിസുകാരന്‍ കൂടി മരിച്ചു. പരിക്കേറ്റ രണ്ട് പോലിസുകാരുടെ നില ഗുരുതരമായി തുടരുകയാണ്. ഇന്നലെയാണ് ആക്രമണം നടന്നത്. പ്രദേശത്ത് അക്രമണം നടത്തിയവര്‍ക്കായി തെരച്ചില്‍ തുടരുകയാണ്.

ഇന്നലെ വൈകുന്നേരം ആറ് മണിയോടെ ശ്രീനഗര്‍ സിവാനിലെ പോലിസ് ക്യാംപിന് സമീപമാണ് ആക്രമണം നടന്നത്. രണ്ടുപേര്‍ പോലിസുകാര്‍ സഞ്ചരിക്കുകയായിരുന്ന ബസിന് നേരെ വെടിവെക്കുകയായിരുന്നു. ജമ്മു കശ്മീര്‍ പോലിസിന്റെ ഒന്‍പതാം ബറ്റാലിയനിലെ പോലിസുകാരാണ് ബസിലുണ്ടായിരുന്നത്. പരിശീലനത്തിന് ശേഷം ക്യാംപിലേക്ക് മടങ്ങുകയായരുന്നു ഇവര്‍. ഈയിടെ സുരാക്ഷാ സേനക്ക് നേരെയുള്ള സായുധാക്രമണത്തിന്റെ തോത് ഏറിയിരിക്കുകയാണ്.