സൂപ്പര്‍ കപ്പ്: സെമി ഉറപ്പിക്കാന്‍ കേരള ബ്ലാസ്റ്റേഴ്സ് ഇന്ന് മുംബൈ സിറ്റിക്കെതിരേ

പനാജി: സൂപ്പര്‍ കപ്പ് ഗ്രൂപ്പ് ഡിയിലെ നിര്‍ണ്ണായകമായ പോരാട്ടത്തിനായി കേരള ബ്ലാസ്റ്റേഴ്സ് എഫ്സി, ഇന്ന് ഫാറ്റോര്‍ദയിലെ ജവഹര്‍ലാല്‍ നെഹ്റു സ്റ്റേഡിയത്തില്‍ വെച്ച് രാത്രി 7:30ന് മുംബൈ സിറ്റി എഫ്സിയെ നേരിടും. തുടര്‍ച്ചയായ രണ്ടു മല്‍സരങ്ങളിലെ വിജയങ്ങളുടെ ആത്മവിശ്വാസത്തിലാണ് ബ്ലാസ്റ്റേഴ്സ് കളത്തിലിറങ്ങുന്നത്. ഈ മല്‍സരത്തില്‍ സമനില നേടിയാല്‍ പോലും ബ്ലാസ്‌റ്റേഴ്‌സിന് സെമിഫൈനല്‍ ഉറപ്പിക്കാം. എങ്കിലും, ഗ്രൂപ്പ് ഘട്ടം മികച്ച രീതിയില്‍ പൂര്‍ത്തിയാക്കാനായി മൂന്നു പോയിന്റും നേടുകയെന്ന ലക്ഷ്യത്തോടെയാകും ബ്ലാസ്റ്റേഴ്സ് കളത്തിലിറങ്ങുക.

'സെമിഫൈനല്‍ സ്ഥാനം ഉറപ്പിക്കാന്‍ പോകുന്ന മുംബൈക്കെതിരായ ഈ കളി എളുപ്പമാകില്ല, ശ്രദ്ധയോടെയാവും ഈ മല്‍സരത്തെ നേരിടുക. ഞങ്ങളുടെ ടീം ആക്രമണത്തില്‍ മികച്ച ഒത്തിണക്കം നേടിയിട്ടുണ്ട്, കൂടാതെ പന്ത് കൂടുതല്‍ സമയം കൈവശം വെച്ച് കളിക്കാനും ഞങ്ങള്‍ക്കിപ്പോള്‍ ആത്മവിശ്വാസമുണ്ട്. കളിക്കാര്‍ സംയമനം പാലിക്കുന്നതും, അവസരങ്ങള്‍ സൃഷ്ടിക്കുന്നതില്‍ ശ്രദ്ധിക്കുന്നതുമാണ് എന്നെ ഏറ്റവും കൂടുതല്‍ സന്തോഷവാനാക്കുന്നത്, അത് തുടരാന്‍ തന്നെയാവും ഞങ്ങള്‍ ഈ മല്‍സരത്തിലും ശ്രമിക്കുക'-ബ്ലാസ്‌റ്റേഴ്‌സ് മുഖ്യ പരിശീലകന്‍ ഡേവിഡ് കാറ്റല പറഞ്ഞു.

കളിച്ച രണ്ടു മല്‍സരങ്ങളില്‍ നിന്ന് ആറു പോയിന്റുകള്‍ നേടി ബ്ലാസ്റ്റേഴ്സ് ഗ്രൂപ്പ് ഡി-യില്‍ ഒന്നാമതാണ്. കാറ്റലയുടെ ശൈലിയുടെ പ്രതിഫലനമെന്നോണം ലക്ഷ്യബോധത്തോടെയും നിയന്ത്രണത്തോടെയും കളിക്കാനാണ് ടീമിന് സാധിച്ചത്. സ്പാനിഷ് സ്‌ട്രൈക്കര്‍ കോള്‍ഡോ ഒബിയെറ്റ ആദ്യ രണ്ടു മല്‍സരങ്ങളില്‍ നിന്ന് മൂന്നു ഗോളുകള്‍ നേടി മികച്ച ഫോമിലാണ്. ഹുവാന്‍ റോഡ്രിഗസ്, ബികാഷ് യുമ്‌നം എന്നിവരടങ്ങിയ പ്രതിരോധം ഈ ടൂര്‍ണമെന്റില്‍ ഇതുവരെ ഒരു ഗോള്‍ പോലും വഴങ്ങിയിട്ടില്ല. നാലു ഗോളുകള്‍ നേടുകയും രണ്ട് ക്ലീന്‍ ഷീറ്റുകള്‍ സ്വന്തമാക്കുകയും ചെയ്ത ബ്ലാസ്റ്റേഴ്സ്, ഈ ടൂര്‍ണമെന്റിലെ മികച്ച ടീമുകളിലൊന്നാണ്.

മുംബൈ സിറ്റി എഫ്സിയെ സംബന്ധിച്ചിടത്തോളം ഈ മല്‍സരം ജയിച്ചേ തീരൂ. കഴിഞ്ഞ മല്‍സരത്തില്‍ രാജസ്താന്‍ യുനൈറ്റഡിനോട് തോറ്റതോടെ അവര്‍ നിലവില്‍ മൂന്നു പോയിന്റുമായി ഗ്രൂപ്പില്‍ രണ്ടാമതാണ്. സെമി സാധ്യത നിലനിര്‍ത്താന്‍ അവര്‍ക്ക് ജയം അനിവാര്യമാണ്, കൂടാതെ കൂടുതല്‍ ഗോള്‍ മാര്‍ജിന്‍ നേടുകയും ചെയ്യണം. ജയത്തില്‍ കുറഞ്ഞതെന്തും മുംബൈയെ പുറത്താക്കും, അതുകൊണ്ടു തന്നെ പീറ്റര്‍ ക്രാറ്റ്കിയുടെ ടീം, ബ്ലാസ്റ്റേഴ്സിനെതിരേ ശക്തമായ ആക്രമണത്തോടെയാകും കളത്തിലിറങ്ങുക, അതുകൊണ്ടു തന്നെ ഇരു ടീമിനും ഇതൊരു കടുപ്പമേറിയ പോരാട്ടമായി മാറുമെന്നതില്‍ സംശയമില്ല.

കൈയെത്തും ദൂരത്ത് സെമിഫൈനല്‍ സ്ഥാനമുള്ള കേരള ബ്ലാസ്റ്റേഴ്സ്, ഈ നിര്‍ണ്ണായക മല്‍സരത്തില്‍ മികച്ച പ്രകടനം പുറത്തെടുത്ത് പൂര്‍ണ ആത്മവിശ്വാസത്തോടെ സെമിയില്‍ കയറാനാവും ശ്രമിക്കുക. മല്‍സരത്തിന്റെ ലൈവ് സംപ്രേഷണം(jiohotstar)ജിയോഹോട്ട്‌സ്റ്റാറിലാണുള്ളത്.