സ്പാനിഷ് കോപ്പാ ഡെല്‍ റേ; വലന്‍സിയ-ബാഴ്‌സ ഫൈനല്‍

മാഡ്രിഡ്: സ്പാനിഷ് കോപ്പാ ഡെല്‍ റേ ചാംപ്യന്‍ഷിപ്പ് ഫൈനലില്‍ വലന്‍സിയ ബാഴ്‌സലോണ പോരാട്ടം. ഇന്ന് നടന്ന റയല്‍ ബെറ്റിസ് വലന്‍സിയ സെമി ഫൈനലില്‍ വലന്‍സിയ ജയിച്ചതോടെയാണ് ബാഴ്‌സയുമായുള്ള അങ്കത്തിന് വഴിയൊരുങ്ങിയത്. രണ്ടാംപാദ മല്‍സരത്തില്‍ 1-0 ത്തിന്റെ ജയമാണ് വലന്‍സിയ നേടിയത്. 56ാം മിനിറ്റില്‍ റൊഡ്രിഗോയാണ് വലന്‍സിയയുടെ ഗോള്‍ നേടിയത്. ആദ്യപാദ മല്‍സരം 2-2 സമനിലയിലായിരുന്നു. ഇരുപാദങ്ങളിലുമായി 3-2ന്റെ ജയമാണ് വലന്‍സിയ നേടിയത്. റയല്‍ മാഡ്രിഡിനെ തോല്‍പ്പിച്ചാണ് ബാഴ്‌സ ഫൈനല്‍ ടിക്കറ്റ് നേടിയത്. റയലിനെതിരേ 4-1ന്റെ ജയമാണ് ബാഴ്‌സ സ്വന്തമാക്കിയത്. തുടര്‍ച്ചയായി നാലുവര്‍ഷവും ബാഴ്‌സയാണ് കോപ്പാ ഡെല്‍ റേയില്‍ മുത്തമിട്ടത്. 30 തവണ ബാഴ്‌സ ഈ ചാംപ്യന്‍ഷിപ്പ് സ്വന്തമാക്കിയിട്ടുണ്ട്. 2008ലാണ് വലന്‍സിയ അവസാനമായി കിരീടം നേടിയത്.