കോപ്പാ ഇറ്റാലിയ ജൂണ്‍ 13ന്; സീരി എ 20ന്

ടൂറിന്‍: ഇറ്റലിയില്‍ വീണ്ടും ഫുട്ബോള്‍ സീസണ്‍ പുനരാരംഭിക്കുന്നു. ജൂണ്‍ 13ന് കോപ്പാ ഇറ്റാലിയ സെമി ഫൈനലോടെയാണ് സീസണിന് തുടക്കമാവുന്നത്. ഇറ്റലിയുടെ കായികമന്ത്രാലയമാണ് വാര്‍ത്ത പുറത്തുവിട്ടത്. ജൂണ്‍ 20നാണ് സീരി എ, സീരി ബി ചാംപ്യന്‍ഷിപ്പുകള്‍ തുടരുന്നത്. നേരത്തെ മാറ്റിവച്ച രണ്ട് സെമിഫൈനലുകളുടെ രണ്ടാംപാദ മല്‍സരങ്ങളാണ് 13ന് നടക്കുക. രണ്ടുമാസത്തിന് ശേഷമാണ് ഇറ്റലിയില്‍ ഫുട്ബോള്‍ മല്‍സരങ്ങള്‍ക്ക് തുടക്കമിടുന്നത്.

സെമിയില്‍ യുവന്റസ് എസി മിലാനെയും നപ്പോളി ഇന്റര്‍ മിലാനെയും നേരിടും. യുവന്റസിന്റെ ഹോം ഗ്രൗണ്ടിലാണ് ആദ്യമല്‍സരം. ആദ്യപാദമല്‍സരം സമനിലയില്‍ പിരിഞ്ഞിരുന്നു. നപ്പോളിയുടെ ഹോം ഗ്രൗണ്ടില്‍ നടക്കുന്ന മല്‍സരത്തിന്റെ ആദ്യപാദത്തില്‍ ഇന്റര്‍മിലാനെതിരേ നപ്പോളിയ്ക്കായിരുന്നു ജയം. സീരി എയില്‍ 12 റൗണ്ട് മല്‍സരങ്ങളാണ് ഇനി നടക്കാനുള്ളത്. ലീഗില്‍ യുവന്റസാണ് ഒന്നാമതുള്ളത്.