മാള്‍ഡീനി ജൂനിയറിന് മിലാനില്‍ സ്വപ്‌ന തുടക്കം

മിലാന്‍: ഇറ്റാലിയന്‍ ഇതിഹാസ താരം പാവ്‌ലോ മാള്‍ഡീനിയുടെ മകന്‍ ഡാനിയേല്‍ മാള്‍ഡീനിയ്ക്ക് എസി മിലാന്‍ സീനിയര്‍ ടീമില്‍ സ്വപ്‌ന തുടക്കം. 19കാരനായ ഡാനിയേല്‍ ഇന്ന് ഇറ്റാലിയന്‍ സീരി എയില്‍ സ്‌പെയ്‌സിയ്‌ക്കെതിരായ മല്‍സരത്തിലാണ് ആദ്യ ഇലവനില്‍ സ്ഥാനം പിടിച്ചത്. 48ാം മിനിറ്റില്‍ ഡാനിയേല്‍ ഒരു ഗോളിലൂടെ തന്റെ വരവ് അറിയിച്ചു. മിലാന്‍ 2-1ന്റെ ജയവും വരിച്ചു. ഡയസാണ് മിലാന്റെ രണ്ടാം ഗോള്‍ നേടിയത്.

2016-17 സീസണിലാണ് താരം മിലാന്റെ ജൂനിയര്‍ ടീമിനായി ഇറങ്ങിയത്.സീനിയര്‍ കരിയറില്‍ സബ്‌സ്റ്റിറ്റിയൂട്ട് ആയി 2020ല്‍ ഹെല്ലാസ് വെറോണയ്ക്കായി ഇറങ്ങിയിരുന്നു. അറ്റാക്കിങ് മിഡ്ഫീല്‍ഡറായ ഡാനിയേല്‍ ഇറ്റലിയുടെ അണ്ടര്‍ 18 ടീമിനായി കളിച്ചിരുന്നു. മാള്‍ഡീനി പരമ്പരയിലെ മൂന്നാം താരമാണ് ഡാനിയേല്‍. ഇതിഹാസ താരം സെസ്സാര്‍ മാള്‍ഡീനിയുടെ മകനാണ് പാവ്‌ലോ മാള്‍ഡീനി. സെസ്സാര്‍ 12 വര്‍ഷം മിലാനിയി കളിച്ചപ്പോള്‍ മകന്‍ മാള്‍ഡീനി 17 വര്‍ഷമാണ് മിലാന്റെ ജെഴ്‌സി അണിഞ്ഞത്. ഡാനിയേലിന്റെ ജേഷ്ടന്‍ ക്രിസ്റ്റ്യന്‍ മിലാനായി അരങ്ങേറ്റം കുറിച്ചിരുന്നെങ്കിലും താരത്തിന് തിളങ്ങാനായിരുന്നില്ല.