ഫ്രഞ്ച് മുന്നേറ്റനിര താരം ഹ്യൂഗോ എക്കിറ്റിക്ക് പരിക്ക്; ലോകകപ്പ് നഷ്ടമാവും

പാരിസ്: ഫ്രഞ്ച് മുന്നേറ്റനിര താരം ഹ്യൂഗോ എക്കിറ്റിക്കെയ്ക്ക് ജൂണില്‍ നടക്കുന്ന ലോകകപ്പ് നഷ്ടമാവും. ചാംപ്യന്‍സ് ലീഗില്‍ ക്വാര്‍ട്ടര്‍ ഫൈനല്‍ മല്‍സരത്തിലാണ് എക്കിറ്റിക്കെയ്ക്ക് പരിക്കേറ്റത്. പിഎസ്ജിയ്‌ക്കെതിരേ ആന്‍ഫീല്‍ഡില്‍ നടന്ന രണ്ടാം പാദ മല്‍സരത്തിന്റെ 27-ാം മിനിറ്റില്‍, കാല്‍ വഴുതി വീണാണ് ഫ്രഞ്ച് സ്‌ട്രൈക്കറുടെ വലതുകാലിന് പരിക്കേറ്റത്. കളിക്കളത്തില്‍ വച്ച് വൈദ്യസഹായം നല്‍കിയെങ്കിലും കളിക്കാന്‍ കഴിയില്ലെന്ന് ഉറപ്പായതോടെ സ്ട്രച്ചറിലാണ് താരത്തെ പുറത്തേക്ക് കൊണ്ടുപോയത്. ലോകകപ്പിന് ഒരുങ്ങുന്ന ഫ്രാന്‍സിന് എക്കിറ്റിക്കെയുടെ പരിക്ക് വലിയ ആശങ്കയാണ്. കഴിഞ്ഞ മാസം ബ്രസീലിനെതിരെ ഫ്രാന്‍സ് 2-1ന് ജയിച്ച മല്‍സരത്തില്‍ താരം ഗോള്‍ നേടിയിരുന്നു. അടുത്ത സീസണിലെ ചാംപ്യന്‍സ് ലീഗ് യോഗ്യത ഉറപ്പിക്കാന്‍ ശ്രമിക്കുന്ന ലിവര്‍പൂളിനും പരിക്ക് കനത്ത തിരിച്ചടിയാവും. കഴിഞ്ഞ ജൂലൈയില്‍ ഐന്‍ട്രാക്റ്റ് ഫ്രാങ്ക്ഫര്‍ട്ടില്‍നിന്ന് 69 ദശലക്ഷം പൗണ്ടിന് ലിവര്‍പൂളിലെത്തിയ എക്കിറ്റിക്കെ, ഈ സീസണില്‍ എല്ലാ മല്‍സരങ്ങളില്‍ നിന്നുമായി 17 ഗോളുകള്‍ നേടിയിട്ടുണ്ട്.