ഇക്വഡോറിനെതിരേ ഡി മരിയയുടെ ഗോളില്‍ അര്‍ജന്റീനയ്ക്ക് വിജയം

ബ്യൂണസ്‌ഐറിസ്: ഇന്ന് നടന്ന അന്താരാഷ്ട്ര സൗഹൃദ മത്സരത്തില്‍ അര്‍ജന്റീന ഇക്വഡോറിനെ പരാജയപ്പെടുത്തി. ഇന്ന് മയാമിയില്‍ വച്ച് നടന്ന മത്സരത്തില്‍ ഏകപക്ഷീയമായ ഒരു ഗോളിനായിരുന്നു അര്‍ജന്റീനയുടെ ജയം. കോപ്പ അമേരിക്കക്കുള്ള ഒരുക്കമായാണ് ഈ മത്സരം നടക്കുന്നത്. അഞ്ചു മാസത്തിനുശേഷം ലയണല്‍ മെസ്സി അര്‍ജന്റീക്ക് വേണ്ടി കളിച്ച മത്സരമായിരുന്നു. രണ്ടാം പകുതിയില്‍ മാത്രമാണ് ലയണല്‍ മെസ്സി കളത്തില്‍ എത്തിയത്.

മത്സരത്തിന്റെ 40 മിനിറ്റില്‍ ഡി മറിയയാണ് അര്‍ജന്റീനക്കായി ഗോള്‍ നേടിയത്. ക്രിസ്റ്റ്യന്‍ റൊമേരോയുടെ അസിസ്റ്റില്‍ നിന്നായിരുന്നു ഈ ഗോള്‍. ജൂണ്‍ 15ന് ഗ്വട്ടമാലക്ക് എതിരെയാണ് അര്‍ജന്റീനയുടെ അടുത്ത മത്സരം. കോപ്പ അമേരിക്കയില്‍ ജൂണ്‍ 20ന് കാനഡയ്‌ക്കെതിരെയാണ് അര്‍ജന്റീനയുടെ ഉദ്ഘാടന മല്‍സരം.