ചാംപ്യന്‍സ് ലീഗില്‍ ബയേണ്‍-പിഎസ്ജി ഫൈനല്‍

ലിസ്ബണ്‍: ചാംപ്യന്‍സ് ലീഗ് ഫൈനലില്‍ പിഎസ്ജി-ബയേണ്‍ മ്യൂണിക്ക് പോരാട്ടം. ഇന്ന് നടന്ന സെമിഫൈനലില്‍ ഫ്രഞ്ച് ക്ലബ്ബ് ലിയോണിനെ എതിരില്ലാത്ത മൂന്ന് ഗോളിന് തോല്‍പ്പിച്ചാണ് ജര്‍മ്മന്‍ ചാംപ്യന്‍മാരായ ബയേണ്‍ ഫൈനലില്‍ ഇടം നേടിയത്. ഗ്‌നാബറിയുടെ ഇരട്ട ഗോളും ലെവന്‍ഡോസ്‌കിയുടെ ഒരു ഗോളുമാണ് ബയേണിന് തുണയായത്. ലിയോണിന്റെ യുവനിരയുടെ ഡിഫന്‍സും മറികടന്നാണ് ബയേണ്‍ യൂറോപ്പിലെ വമ്പന്‍മാരുടെ പോരാട്ടത്തിന് ടിക്കറ്റെടുത്തത്. കിട്ടിയ അവസരങ്ങള്‍ ലക്ഷ്യത്തിലെത്തിക്കാന്‍ ലിയോണിന് കഴിയാതിരുന്നതും അവര്‍ക്ക് തിരിച്ചടിയായി. 18, 33 മിനിറ്റുകളിലായിരുന്നു ഗ്‌നബറിയുടെ ഗോളുകള്‍. 88ാം മിനിറ്റിലാണ് ലെവന്‍ഡോസ്‌കിയുടെ ഗോള്‍. ബയേണിന്റെ 11ാം ചാംപ്യന്‍സ് ലീഗ് ഫൈനലാണിത്. ലെപ്സിഗിനെ തോല്‍പ്പിച്ച പിഎസ്ജിയാണ് ബയേണിന്റെ ഫൈനലിലെ എതിരാളികള്‍. ഞായറാഴ്ചയാണ് ഫൈനല്‍.