സെല്‍ഫി എടുക്കാന്‍ വിസമ്മതിച്ചു; പൃഥ്വി ഷായ്‌ക്കെതിരേ ആള്‍ക്കൂട്ട ആക്രമണം

മുംബൈ: സെല്‍ഫി എടുക്കാന്‍ വിസമ്മതിച്ചതിനെ തുടര്‍ന്ന് ഇന്ത്യന്‍ ക്രിക്കറ്റ് താരം പൃഥ്വി ഷായ്ക്കെതിരേ ആള്‍ക്കൂട്ട ആക്രമണം. കഴിഞ്ഞ ദിവസം രാത്രിയാണ് സംഭവം. സുഹൃത്തിന്റെ കൂടെ ഡിന്നര്‍ കഴിച്ച് വരുമ്പോഴാണ് ആക്രമണം. ആദ്യം ഒരാള്‍ സെല്‍ഫി ആവശ്യപ്പെട്ടു വരികയായിരുന്നു. തുടര്‍ന്ന് പൃഥ്വി ഷാ അതിന് അനുവദിച്ചു. എന്നാല്‍ നിമിഷങ്ങള്‍ക്കുള്ളില്‍ കൂടുതല്‍ പേരുമായി ഇയാള്‍ സെല്‍ഫിയ്ക്കായി വന്നു. ഇതിന് താരം അനുവാദം നല്‍കിയില്ല. ഹോട്ടല്‍ ജീവനക്കാര്‍ സെല്‍ഫിയ്ക്കായെത്തിയ ആള്‍ക്കൂട്ടത്തെ തടയുകയും ചെയ്തു. ഇതിനിടെയാണ് പൃഥ്വിഷായുടെ സുഹൃത്തിന്റെ കാര്‍ അക്രമികള്‍ തടയുകയും ബേസ് ബോള്‍ കളിക്കുന്ന ബാറ്റ് കൊണ്ട് അടിച്ച് തകര്‍ക്കുകയും ചെയ്തത്. ആക്രമണവുമായി ബന്ധപ്പെട്ട് സോഷ്യല്‍ മീഡിയ ഇന്‍ഫ്‌ളുവെന്‍സറായ സപ്‌നാ ഗില്‍ അടക്കം എട്ട് പേരെ പോലിസ് കസ്റ്റഡിയിലെടുത്തു.