പ്രവാസികളുടെ ആശങ്കയകറ്റണം ഖത്തർ ഇന്ത്യൻ സോഷ്യൽ ഫോറം

ദോഹ: കൊവിഡ് 19 പശ്ചാത്തലത്തിൽ പ്രവാസികളുടെ പ്രയാസങ്ങൾ കേൾക്കാനും പരിഹാരം കാണാനും കേന്ദ്ര സർക്കാർ മുന്നോട്ട് വരണമെന്ന് സോഷ്യൽ ഫോറം പത്ര കുറിപ്പിലൂടെ ആവശ്യപ്പെട്ടു. നാളിതു വരെയായി നാട്ടിലെ വികസനത്തിന്റെ നെടുംതൂണായി പ്രവർത്തിച്ച പ്രവാസികളെ പ്രയാസ ഘട്ടത്തിൽ കൈയൊഴിയുന്ന കേന്ദ്ര സർക്കാരിന്റെ നിലപാട് വേദനാ ജനകാമണ്.

ഗൾഫ് മേഖലയിൽ ഭരണാധികാരികൾ പ്രവാസികളോട് അനുകമ്പയോടെയാണ് പെരുമാറുന്നത്. നമ്മുടെ കേന്ദ്ര സർക്കാരും പ്രവാസികളുടെ കാര്യത്തിൽ അനുകൂലമായ നിലപാട് എടുക്കാൻ ഇനിയും വൈകരുത്. ഗൾഫ് മേഖലയിൽ വിസാ കാലവധി കഴിഞ്ഞവരും തൊഴിലില്ലാത്തവരും പല കാരണങ്ങളാൽ ചികിൽസ ആവശ്യമുള്ളവരുമടക്കം നാട്ടിലേക്ക് മടങ്ങാനാഗ്രഹിക്കുന്ന പ്രവാസികളെ മടക്കിക്കൊണ്ടുവരുന്നതിന് പ്രത്യേക വിമാന സർവീസ് ആരംഭിക്കാൻ തയ്യാറകണമെന്ന ആവശ്യം വ്യാപകമായി ഉയർന്നിട്ടും കേന്ദ്ര സർക്കാർ നിഷേധാത്മക നിലപാടാണ് സ്വീകരിക്കുന്നത്.

ഈ നിലപാട് തിരുത്തി പ്രവാസികളെ സംരക്ഷിക്കുന്ന നിലപാട് സ്വീകരിക്കണമെന്നും ജോലിയിൽ പ്രയാസമനുഭവിക്കുന്നത് കാരണം നാട്ടിലെ പ്രവാസി കുടുംബങ്ങൾ അനുഭവിക്കുന്ന പ്രയാസങ്ങളിൽ നിന്ന് കര കയറാൻ ആശ്വാസകരമായ പാക്കേജ് പ്രഖ്യാപിക്കണമെന്നും ഖത്തർ ഇന്ത്യൻ സോഷ്യൽ ഫോറം കേരളഘടകം പത്ര കുറിപ്പിലൂടെ ആവശ്യപെട്ടു.