യുവജനക്ഷേമ ബോര്‍ഡിന്റെ പരിപാടിയിലേക്ക് യൂത്ത് ലീഗ് പ്രവത്തകര്‍ തള്ളിക്കയറി; സംഘര്‍ഷം

മലപ്പുറം: മലപ്പുറത്ത് സംസ്ഥാന യുവജനക്ഷേമ ബോര്‍ഡിന്റെ സ്പീക്ക് യങ് പരിപാടിക്കിടെ യൂത്ത് ലീഗ്-ഡിവൈഎഫ്ഐ സംഘര്‍ഷം. വെള്ളിയാഴ്ച വൈകീട്ട് ടൗണ്‍ഹാള്‍ അങ്കണത്തില്‍ നടന്ന പരിപാടിക്കിടെയാണ് ഇരുവിഭാഗങ്ങളും തമ്മില്‍ ഏറ്റുമുട്ടിയത്.

സര്‍ക്കാരിന്റെ പിന്‍വാതില്‍ നിയമനങ്ങളില്‍ പ്രതിഷേധിച്ച് യൂത്ത് ലീഗ് പ്രവര്‍ത്തകര്‍ യുവജനക്ഷേമ ബേര്‍ഡിന്റെ പരിപാടിക്കിടയിലേക്ക് പ്രതിഷേധ മാര്‍ച്ചുമായി എത്തുകയായിരുന്നു. സദസിലെ കസേരകളും മറ്റും യൂത്ത് ലീഗ് പ്രവര്‍ത്തകര്‍ വലിച്ചെറിഞ്ഞു. പിന്നാലെ ഇരുവിഭാഗങ്ങളും തമ്മില്‍ സംഘര്‍ഷമായതോടെ പോലിസ് ലാത്തിവീശി.

പ്രകടനം പോലിസ് തടഞ്ഞെങ്കിലും ചില പ്രവര്‍ത്തകര്‍ പ്രതിരോധം ഭേദിച്ച് അകത്തു കയറുകയായിരുന്നു. ഉന്തും തള്ളും കസേരകള്‍ കൊണ്ട് പരസ്പരം തല്ലുമുണ്ടായി. പിന്നീട് കൂടുതല്‍ പോലിസ് എത്തി യൂത്ത് ലീഗ് പ്രവര്‍ത്തകരെ ഗേറ്റിനു പുറത്താക്കുകയായിരുന്നു.

പോലിസ് യൂത്ത് ലീഗ് പ്രവര്‍ത്തകരെ പരിപാടി നടക്കുന്ന വേദിക്ക് പുറത്താക്കിയെങ്കിലും മുദ്രാവാക്യം വിളികളുമായി പ്രവത്തകര്‍ പുറത്ത് നിലയുറപ്പിച്ചിട്ടുണ്ട്‌. സംഘര്‍ഷ സാഹചര്യം നിലനില്‍ക്കുന്നതിനാല്‍ വലിയ പോലിസ് സന്നാഹം സ്ഥലത്തുണ്ട്‌.