തൃശൂരില്‍നിന്ന് മല്‍സ്യബന്ധനത്തിന് പോയ ബോട്ട് കടലില്‍ മറിഞ്ഞു; ഒരാളെ കാണാതായി

തൃശൂര്‍: തൃശൂരില്‍നിന്ന് മല്‍സ്യബന്ധനത്തിനുപോയ ബോട്ട് കടലില്‍ മറിഞ്ഞ് ഒരാളെ കാണാതായി. 'മഹാ' ചുഴലിക്കാറ്റിനെത്തുടര്‍ന്ന് കടല്‍ക്ഷോഭം രൂക്ഷമായതിനെത്തുടര്‍ന്നാണ് അപകടമുണ്ടായത്. തൃശൂര്‍ മുനയ്ക്കല്‍ തീരത്തുനിന്ന് പോയ സാമുവല്‍ എന്ന ബോട്ടാണ് കടലില്‍ മറിഞ്ഞത്. ഫോര്‍ട്ട് കൊച്ചി തീര്‍ത്തുവച്ചായിരുന്നു അപകടം.

ഈ ബോട്ടിലുണ്ടായിരുന്ന അഞ്ചുപേരെ കോസ്റ്റ് ഗാര്‍ഡ് രക്ഷിച്ച് കരക്കെത്തിച്ചു. മല്‍സ്യബന്ധനത്തിനു പോയ തമ്പുരാന്‍ എന്ന ബോട്ടിലുള്ളവരോട് മടങ്ങാന്‍ നിര്‍ദേശിച്ചിട്ടുണ്ടെന്നു തീരദേശ പോലിസ് അറിയിച്ചു. നാലുദിവസം മുമ്പാണ് ബോട്ടുകള്‍ മല്‍സ്യബന്ധനത്തിനു തിരിച്ചത്.