ചോരക്കുഞ്ഞിനെ വഴിയിലുപേക്ഷിച്ച നിലയില്‍ കണ്ടെത്തി

കൊല്ലം: ശാസ്താംകോട്ട ജങ്ഷന് സമീപത്തുനിന്നും ചോരക്കുഞ്ഞിനെ ഉപേക്ഷിച്ച നിലയില്‍ കണ്ടെത്തി. ബുധനാഴ്ച രാത്രി 11 മണിയോടെ ശാസ്താംകോട്ട ജങ്ഷനില്‍ മെഡിക്കല്‍ സ്‌റ്റോര്‍ നടത്തുന്ന രതീഷ് കൃഷ്ണനാണ് ചോരക്കുഞ്ഞിനെ വഴിയിലുപേക്ഷിച്ച നിലയില്‍ കണ്ടെത്തിയത്. തുടര്‍ന്ന് യുവാവ് ഇക്കാര്യം ഫേസ്ബുക്കില്‍ പോസ്റ്റ് ചെയ്യുകയായിരുന്നു.

രതീഷും അനുജനും കൂടി രാത്രി കടയടച്ച് വീട്ടിലേക്ക് വരുമ്പോഴാണ് ശാസ്താംകോട്ട ജങ്ഷനില്‍നിന്ന് ഒരു കുഞ്ഞിന്റെ കരച്ചില്‍ കേട്ടത്. ഇരുവരും ശബ്ദംകേട്ട സ്ഥലത്തെത്തിയപ്പോള്‍ ഒരുകൂട്ടം തെരുവുനായ്ക്കളാല്‍ ചുറ്റപ്പെട്ട നിലയിലായിരുന്നു കുട്ടി കിടന്നിരുന്നത്. കുട്ടിയെ അവിടെ നിന്ന് രക്ഷിച്ച രതീഷ് ഉടന്‍തന്നെ പോലിസിനെ വിളിച്ച് ആശുപത്രിയിലെത്തിച്ചു. അവിടെനിന്ന് പ്രഥമശുശ്രൂഷകള്‍ നല്‍കിയ ശേഷം കുട്ടിയെ കൊല്ലം അമ്മത്തൊട്ടിലിലേക്ക് മാറ്റി.