തിരുവനന്തപുരത്ത് ഭക്ഷ്യ വിഷബാധ; ചൂര മീന്‍ കഴിച്ച നിരവധി പേര്‍ ചികിൽസയില്‍

തിരുവനന്തപുരം: കാട്ടാക്കട പഞ്ചായത്തിലെ വിവിധ പ്രദേശങ്ങളില്‍ ചൂര മീന്‍ കഴിച്ചവര്‍ക്കു ഭക്ഷ്യ വിഷബാധയെന്നു സംശയം. രണ്ടു ദിവസമായി പ്ലാവൂര്‍, മംഗലയ്ക്കല്‍ പ്രദേശങ്ങളിലെ കുട്ടികള്‍ ഉള്‍പ്പെടെ നിരവധി പേര്‍ വിവിധ ആശുപത്രികളില്‍ ചികിൽസ തേടി. ആരോഗ്യ വകുപ്പ് അന്വേഷണം ആരംഭിച്ചു.

ഇന്നലെ ആമച്ചല്‍ കുടുംബാരോഗ്യ കേന്ദ്രത്തില്‍ പത്തിലധികം കുട്ടികള്‍ ചികിൽസ തേടി. വയറുവേദനയും ഛര്‍ദ്ദിയും അനുഭവപ്പെട്ടാണു ചികിൽസ തേടിയത്. എല്ലാവരും മംഗലയ്ക്കല്‍, പ്ലാവൂര്‍, പാറയില്‍, പാപ്പനം പ്രദേശവാസികളാണ്.

ഞായര്‍ രാത്രി മുതലാണു പലര്‍ക്കും അസ്വസ്ഥത അനുഭവപ്പെട്ടു തുടങ്ങിയത്. പ്ലാവൂരില്‍ ഒരു കുടുംബത്തിലെ എല്ലാവര്‍ക്കും അസ്വസ്ഥത അനുഭവപ്പെട്ടതോടെയാണു സംശയം ഉടലെടുത്തത്. പത്തു വയസ്സുകാരനുള്‍പ്പെടെ ചികിൽസ തേടി. കുട്ടിയുടെ പിതാവ് കാട്ടാക്കടയിലെ സ്വകാര്യ ആശുപത്രിയില്‍ ചികിൽസയിലാണ്.