വിദ്യാര്‍ഥികളെ ഇടകലര്‍ത്തിയിരുത്തിയതിന് അധ്യാപകനെ പുറത്താക്കി; പ്രിന്‍സിപ്പലിനെ പൂട്ടിയിട്ടു

കോഴിക്കോട്: ആണ്‍കുട്ടികളെയും പെണ്‍കുട്ടികളെയും ഒന്നിച്ചിരുത്തിയതിനെത്തുടര്‍ന്ന് അധ്യാപകനെ പുറത്താക്കിയതില്‍ പ്രതിഷേധിച്ച് കോളജ് പ്രിന്‍സിപ്പലിനെ വിദ്യാര്‍ഥികള്‍ പൂട്ടിയിട്ടു. ചേളന്നൂര്‍ ശ്രീനാരായണഗുരു കോളജ് (എസ്എന്‍ കോളജ്) പ്രിന്‍സിപ്പലിനെയാണു വിദ്യാര്‍ഥികള്‍ പൂട്ടിയിട്ടത്. ക്ലാസ് സെമിനാറില്‍ ആണ്‍കുട്ടികളെയും പെണ്‍കുട്ടികളെയും ഒന്നിച്ചിരുത്തിയ താല്‍ക്കാലിക അധ്യാപകനെ പ്രിന്‍സിപ്പല്‍ പുറത്താക്കിയിരുന്നു.

കഴിഞ്ഞയാഴ്ചയായിരുന്നു സംഭവം. ഇതിനെതിരെയാണു പ്രിന്‍സിപ്പല്‍ വി ദേവിപ്രിയയെ വിദ്യാര്‍ഥികള്‍ ഓഫിസ് മുറിയില്‍ പൂട്ടിയിട്ടത്. വിദ്യാര്‍ഥികള്‍ ഓഫിസിനു പുറത്തു കുത്തിയിരിപ്പ് പ്രതിഷേധസമരം നടത്തുകയാണ്. അധ്യാപകനെ തിരിച്ചെടുക്കുന്നതുവരെ സമരം തുടരുമെന്നാണു വിദ്യാര്‍ഥികള്‍ പറയുന്നത്.