കസ്റ്റഡി മരണം: പ്രതികളുടെ സ്വത്തുക്കള്‍ കണ്ടുകെട്ടി നഷ്ടപരിഹാരത്തുക ഈടാക്കണം: എസ്ഡിപിഐ

കണ്ണൂര്‍: പോലിസിന്റെ ക്രൂരമായ മര്‍ദനത്തില്‍ കൊല്ലപ്പെട്ട രാജ്കുമാറിന്റെ കുടുംബത്തിന് സര്‍ക്കാര്‍ അനുവദിച്ച 16 ലക്ഷം രൂപ നല്‍കാന്‍ പ്രതികളുടെ സ്വത്തുക്കള്‍ കണ്ടുകെട്ടി നഷ്ടപരിഹാരത്തുക ഈടാക്കണമെന്ന് എസ്ഡിപിഐ സംസ്ഥാന സെക്രട്ടറി കെ കെ അബ്ദുല്‍ ജബ്ബാര്‍.

ഉന്നത പോലിസുദ്യോഗസ്ഥര്‍ പ്രതിയായ കേസില്‍ നഷ്ടപരിഹാരത്തുക കണ്ടത്തേണ്ടത് കുറ്റക്കാരായ പോലിസുകാരുടെ സ്വത്തില്‍ നിന്നാണ്. അതല്ലാതെ പാവങ്ങളുടെ പിച്ചച്ചട്ടിയില്‍ കൈയിട്ടു വാരിയിട്ടല്ല നഷ്ടപരിഹാരം നല്‍കേണ്ടത്. പ്രളയ ദുരിതാശ്വാസ ഫണ്ടില്‍ നിന്ന് തുക വകമാറ്റി നല്‍കാനുള്ള മന്ത്രിസഭാ തീരുമാനം പുനപ്പരിശോധിക്കണം. പോലിസുകാര്‍ ചെയ്ത കുറ്റത്തിന് നിരപരാധികളായ സാധാരണക്കാരെ പിഴിയുന്ന നടപടി കുറ്റവാളികള്‍ക്ക് കൂടുതല്‍ പ്രോല്‍സാഹനമാവുമെന്നും സര്‍ക്കാര്‍ തീരുമാനം പിന്‍വലിക്കണമെന്നും അബ്ദുല്‍ ജബ്ബാര്‍ ആവശ്യപ്പെട്ടു.