പിഎം ശ്രീയില്‍ പുനപരിശോധന; 'റിപോര്‍ട്ട് വരുന്നതുവരെ പദ്ധതി മരവിപ്പിക്കും': മുഖ്യമന്ത്രി

തിരുവനന്തപുരം: കേന്ദ്രസര്‍ക്കാരിന്റെ പിഎം ശ്രീ പദ്ധതി പുനപരിശോധിക്കുമെന്ന് മുഖ്യമന്ത്രി പിണറായി വിജയന്‍. മന്ത്രിസഭ ഉപസമിതി പിഎം ശ്രീ പരിശോധിക്കുമെന്നും റിപോര്‍ട്ട് വരുന്നതുവരെ പദ്ധതി മരവിപ്പിക്കുമെന്നും മുഖ്യമന്ത്രി വാര്‍ത്താസമ്മേളനത്തില്‍ പറഞ്ഞു. ഏഴംഗ മന്ത്രിസഭാ ഉപസമിതിയാണ് പിഎം ശ്രീ പരിശോധിക്കുക. മരവിപ്പിക്കുന്ന കാര്യം കേന്ദ്രത്തെ അറിയിക്കുമെന്നും മുഖ്യമന്ത്രി കൂട്ടിച്ചേര്‍ത്തു.

പുനപരിശോധിക്കാന്‍ മന്ത്രിസഭാ ഉപസമിതി

പിഎം ശ്രീ പദ്ധതി പുനപരിശോധിക്കുന്നതിനും റിപോര്‍ട്ട് തയ്യാറാക്കുന്നതിനുമായി ഏഴംഗ മന്ത്രിസഭാ ഉപസമിതിയെ നിയമിച്ചു. വിദ്യാഭ്യാസ മന്ത്രി വി ശിവന്‍കുട്ടിയാണ് ഉപസമിതിയുടെ അധ്യക്ഷന്‍. റവന്യൂ മന്ത്രി കെ രാജന്‍, വ്യവസായ മന്ത്രി പി രാജീവ്, ജലവിഭവ മന്ത്രി റോഷി അഗസ്റ്റിന്‍, കൃഷി മന്ത്രി പി പ്രസാദ്, വൈദ്യുതി മന്ത്രി കെ കൃഷ്ണന്‍കുട്ടി, വനം മന്ത്രി എ കെ ശശീന്ദ്രന്‍ എന്നിവരാണ് സമിതിയിലെ മറ്റ് അംഗങ്ങള്‍. സിപിഐ ഉള്‍പ്പെടെയുള്ള കക്ഷികളുടെ കടുത്ത നിലപാടിന് വഴങ്ങിയാണ് സിപിഎം നേതൃത്വം പിഎം ശ്രീ പദ്ധതി തല്‍ക്കാലം നിര്‍ത്തിവയ്ക്കാന്‍ തീരുമാനിച്ചത്.