ഇന്ധനവില കുതിക്കുന്നു; പെട്രോളിന് 25 പൈസയും ഡീസലിന് 31 പൈസയും കൂട്ടി

കൊച്ചി: രാജ്യത്ത് ഇന്ധന വില ഇന്നും വര്‍ധിപ്പിച്ചു. പെട്രോള്‍ ലിറ്ററിന് 25 പൈസയും ഡീസലിന് 31 പൈസയുമാണ് ഇന്ന് കൂട്ടിയത്. വ്യാഴാഴ്ച പെട്രോളിന് 25 പൈസയും ഡീസലിന് 32 പൈസും വര്‍ധിച്ചിരുന്നു. കൊച്ചിയില്‍ ഇന്ന് പെട്രോള്‍ ലിറ്ററിന് 102.07 രൂപയും ഡീസലിന് 95.08 രൂപയുമാണ് പുതിയ ഇന്ധനവില. തിരുവനന്തപുരത്ത് പെട്രോളിന് 104.13 രൂപയും ഡീസലിന് 97.12 രൂപയുമാണ്.

കോഴിക്കോട്ട് പെട്രോളിനും ഡീസലിനും യഥാക്രമം 102.34 രൂപയും 95.35 രൂപയുമാണ്. ക്രൂഡ് ഓയിലിന്റെ വിലയില്‍ വര്‍ധനവുണ്ടായതാണ് ഇന്ധനവില വീണ്ടും ഉയരാന്‍ കാരണമായതെന്നാണ് എണ്ണക്കമ്പനികള്‍ പറയുന്നത്. ഒരു ഇടവേളയ്ക്ക് ശേഷം കഴിഞ്ഞ ദിവസം മുതലാണ് രാജ്യത്ത് പെട്രോള്‍ വില വര്‍ധിപ്പിച്ച് തുടങ്ങിയത്. ഡീസല്‍ വില കഴിഞ്ഞ കുറച്ചുദിവസങ്ങളായി തുടര്‍ച്ചയായി വര്‍ധിപ്പിച്ചിരുന്നു.