ഫുട്‌ബോള്‍ താരം ഐ എം വിജയന്റെ സഹോദരന്‍ വാഹനാപകടത്തില്‍ മരിച്ചു

തൃശൂര്‍: മുന്‍ ഇന്ത്യന്‍ ഫുട്‌ബോള്‍ താരം ഐ എം വിജയന്റെ സഹോദരന്‍ ചെമ്പൂക്കാവ് അയിനിവളപ്പില്‍ ബിജു(52) വാഹനാപകടത്തില്‍ മരിച്ചു. വെള്ളിയാഴ്ച രാത്രി 10.30ഓടെ തൃശൂര്‍ അക്വാട്ടിക് സ്‌റ്റേഡിയത്തിന് സമീപം പുതിയ സ്റ്റാന്‍ഡിനു സമീപം ബൈക്കില്‍ വരികയായിരുന്ന ബിജു എതിരേവന്നിരുന്ന കാറുമായി കൂട്ടിയിടിക്കുകയായിരുന്നു.

നെഞ്ചിനും തലയ്ക്കുമാണ് പരിക്കേറ്റത്. ബിജുവിനൊപ്പം ബൈക്കിലുണ്ടായിരുന്ന എ ആര്‍ ക്യാംപിലെ പോലിസുകാരന്‍ വൈക്കം ഇല്ലിക്കല്‍ വീട്ടില്‍ ലിഗേഷിനു(31) നിസാര പരിക്കേറ്റു. ഉടന്‍ സ്വകാര്യ ആശുപത്രിയില്‍ പ്രവേശിപ്പിച്ചെങ്കിലും രാത്രി 1.30ഓടെ മരണപ്പെട്ടു. സംസ്‌കാരം പിന്നീട്.