കൊവിഡ് വ്യാപനം; മലപ്പുറം ജില്ലയിലെ ഡ്രൈവിങ് ടെസ്റ്റുകളും രജിസ്‌ട്രേഷന്‍ പുതുക്കലും നിര്‍ത്തിവച്ചു

മലപ്പുറം: കൊവിഡ് വ്യാപനത്തിന്റെ പശ്ചാത്തലത്തില്‍ സര്‍ക്കാര്‍ തലത്തില്‍ നടത്തിവരുന്ന ഡ്രൈവിങ് ടെസ്റ്റുകളും ഫിറ്റ്‌നസ്, രജിസ്‌ട്രേഷന്‍ പുതുക്കല്‍ തുടങ്ങിയ വാഹനപരിശോധനകളും രണ്ടാഴ്ചത്തേയ്ക്ക് നിര്‍ത്തിവച്ചു. ഇന്ന് മുതല്‍ തീരുമാനം പ്രാബല്യത്തിലായതായി മലപ്പുറം ആര്‍ടിഒ അറിയിച്ചു. രണ്ടാഴ്ച കാലയളവില്‍ മുന്‍കൂട്ടി സ്ലോട്ട് ബുക്ക് ചെയ്തവര്‍ക്ക് പിന്നീട് അവസരം നല്‍കും.

ഓണ്‍ലൈന്‍ സേവനങ്ങള്‍ മാത്രമേ ഇക്കാലയളവില്‍ അനുവദിക്കുകയുള്ളൂ. ഓണ്‍ലൈന്‍ മുഖാന്തരം സമര്‍പ്പിക്കുന്ന അപേക്ഷകള്‍ ഓഫിസിന് പുറത്തുവച്ചിരിക്കുന്ന ബോക്‌സില്‍ നിക്ഷേപിക്കാം. ഫോണ്‍ മുഖാന്തരമുള്ള അന്വേഷണങ്ങള്‍ മാത്രമേ ഈ സമയം ഉണ്ടാവുകയുള്ളൂ. ആര്‍ടി ഓഫിസില്‍ നടത്താന്‍ നിശ്ചയിച്ചിരുന്ന എല്ലാവിധ കൂടിക്കാഴ്ചകളും നേരിട്ടുള്ള കൗണ്ടര്‍ സേവനങ്ങളും അന്വേഷണങ്ങളും രണ്ടാഴ്ചത്തേയ്ക്ക് നിര്‍ത്തിവച്ചതായും ആര്‍ടിഒ അറിയിച്ചു.