കൊവിഡ്: കേരള ആരോഗ്യ സര്‍വകലാശാലക്ക് കീഴിലുള്ള പരീക്ഷകള്‍ മാറ്റിവെക്കണം- കാംപസ് ഫ്രണ്ട്

കണ്ണൂര്‍: കൊവിഡ് വ്യാപന പശ്ചാത്തലത്തില്‍ കേരള ആരോഗ്യ സര്‍വകലാശാലക്ക് കീഴിലുള്ള പരീക്ഷകള്‍ മാറ്റിവെക്കണമെന്ന കാംപസ് ഫ്രണ്ട് സംസ്ഥാന ട്രഷറര്‍ എം ഷെയ്ഖ് റസല്‍ ആവശ്യപ്പെട്ടു. കൊവിഡിന്റെ രണ്ടാം തരംഗം സംസ്ഥാനത്തെ വലിയ രീതിയയില്‍ ബാധിക്കപെട്ടുകൊണ്ടിരിക്കുകയാണ്. ദൈനംദിനം പോസിറ്റീവ് കേസുകള്‍ വര്‍ധിക്കുകയും നിരവധി കാംപസുകളിലും ഹോസ്റ്റലുകളിലും വിദ്യാര്‍ത്ഥികള്‍ക്ക് സമ്പര്‍ക്കത്തിലൂടെ ഇതിനകം രോഗം പിടിപെടുകയും ചെയ്തിട്ടുണ്ട്.

മാത്രവുമല്ല കണ്ടയിന്‍മെന്റ് സോണുകളുടെ എണ്ണം വര്‍ധിച്ചുകൊണ്ടിരിക്കുകയാണ്. സംസ്ഥാന സര്‍ക്കാര്‍ സ്ഥിതിഗതികള്‍ നിയന്ത്രിക്കുന്നതിനു വേണ്ടി മറ്റു ഇടപെടലുകലും കൂടുതലായി നടത്തിക്കൊണ്ടിരിക്കുകയാണ്. പ്രത്യേക സാഹചര്യം കണക്കിലെടുത്ത് ചാന്‍സലര്‍ കൂടിയായ ഗവര്‍ണര്‍ ഇടപെട്ട് പരീക്ഷകള്‍ മാറ്റിവെക്കാന്‍ തീരുമാനമായിരുന്നു. എന്നാല്‍ ഗവര്‍ണക്ക് കത്തയച്ച് ഭീതിജനകമായ കൊവിഡ് കാലത്തും പരീക്ഷയുമായി മുന്നോട്ട് പോകാനാണ് കേരള ആരോഗ്യ സര്‍വകലാശാല അധികൃതര്‍ ശ്രമിക്കുന്നത്. വിദ്യാര്‍ഥികള്‍ എല്ലാവരും വാക്‌സിനേഷന്‍ എടുത്തിട്ടുണ്ടെന്നും അതുകൊണ്ട് പരീക്ഷ നടത്താമെന്നുമാണ് സര്‍വകലാശാല അധികൃതര്‍ പറയുന്നത്.

എന്നാല്‍. യഥാര്‍ത്ഥത്തില്‍ ഭൂരിഭാഗം വിദ്യാര്‍ത്ഥികളും ഇതു വരെ വാക്‌സിന്‍ സ്വീകരിക്കാത്തവരാണ്. മാത്രവുമല്ല പുതിയ സാഹചര്യത്തില്‍ കണ്ടെയിണ്മെന്റ് സോണുകളില്‍ നിന്നും പരീക്ഷ കേന്ദ്രങ്ങളിലേക്കുള്ള യാത്രകളും വിദ്യാര്‍ഥികള്‍ക്ക് പ്രയാസം സൃഷ്ടിക്കുന്നതാണ്. സ്ഥിതിഗതികള്‍ രൂക്ഷമാണെന്നിരിക്കെ പരീക്ഷ നടത്തിപ്പുമായി മുന്നോട്ട് പോകുന്നത് വിദ്യാര്‍ത്ഥികളെയും സമൂഹത്തെയും ദോഷകരമായി ബാധിക്കുമെന്നത് തീര്‍ച്ചയാണ്. അത് കൊണ്ട് തന്നെ ആരോഗ്യ സര്‍വകലാശാല പരീക്ഷകള്‍ നീട്ടി വെക്കുന്നതിന് ഗവര്‍ണര്‍ അടിയന്തിരമായി ഇടപെടണമെന്നും ഷെയ്ഖ് റസല്‍ ആവശ്യപെട്ടു.